نەتانیاهۆ: ئەگەر حەماس ناوی بارمتەکان ئاشکرا نەکات ئاگربەست ناکەین

ئاڤا نیوز

چەند کاتژمێرێک پێش ئەوەی ڕێککەوتنی ئاگربەست بچێتە بواری جێبەجێکردنەوە، بنیامین نەتانیاهۆ سەرۆکوەزیرانی ئیسرائیل ڕایگەیاند، ئیسرائیل تا ئێستا لیستی ناوی ئەو بارمتانەی پێنەگەیشتووە کە بڕیارە حەماس ئازادیان بکات، ئەمەش ڕەنگە ڕێککەوتنەکە ڕابگرێت.

وێنە گەورەکە: بەپێی ڕێککەوتنی ئیسرائیل و حەماس، دەبێت حەماس کەمتر لە 24 کاتژمێر پێش ئازادکردنی بارمتەکان ناوەکانیان ئاشکرا بکات کە کاتژمێر 4ی دوای نیوەڕۆ بوو بەکاتی فەڵەستین، بەڵام حەماس ئەو هەنگاوەی نەنا و ئیسرائیلیش بە پێشێلکردنی ڕێککەوتنەکە تۆمەتباری دەکات.

لێدوانی فەرمی: بنیامین نەتانیاهۆ، سەرۆک وەزیرانی ئیسرائیل ڕایگەیاند: تاوەکو لیستی ئەو بارمتانەیان بە دەست نەگات کە بڕیارە حەماس ئازادیان بکات، ڕێککەوتنی ئاگربەست لەگەڵ حەماس جێبەجێ ناکەن و ئیسرائیل ناتوانێت پێشێلکردنی ڕێککەوتنەکە قبووڵ بکات و بەرپرسیارێتییەکەی لە ئەستۆی حەماس دایە.

باکگراوەند: بڕیارە بەرەبەیانی ڕۆژی یەکشەممە ڕێککەوتنی ئاگربەست لە نێوان ئیسرائیل و حەماس بچێتە بواری جێبەجێکردنەوە و لە دوای نیوەڕۆی ئەو ڕۆژەدا یەکەم گروپی دیلەکان لە نێوان ئیسرائیل و حەماس ئاڵوگۆڕیان پێبکرێت.