پڕۆسەی پاککردنەوەی شاری کەرکووک لە زبڵ و خاشاک وەکو پێویست نییە

ئاڤا نیوز

 

تەنها دوای پێنج مانگ لە بڕیارێکی پارێزگای کەرکوووک بۆ کۆکردنەوەی زبڵ و خاشاکی شەقامەکانی کەرکووک، دووبارە ئەو شەقامانە سیمای پێشوویان وەرگرتووەتەوە بەهۆی ئەوەی کۆمپانیاکان وەکو پێویست بە ئەرکی خۆیان هەڵناستن. 

 

وێنە گەورەکە: لەگەڵ دەستبەکاربوونی ڕێبوار تەها، پارێزگاری کەرکووک، مژانەی بە هاووڵاتییانی شارەکەیدا کە کوچە و کۆڵانەکانیان بە تەواوی پاک دەکرێنەوە، بەڵام ئەو بڕیارەی تەنها کەمتر لە شەش مانگی خایاند بەهۆی ئەوەی کۆمپانیاکان تەنها لەسەرەتادا گەرم و گوڕییان پێوە دیار بوو و ئێستا دۆخەکە وەکو پێشووتری لێهاتووەتەوە. 

 

زانیاریی زیاتر: بەشێک لە هاووڵاتییانی شارەکە کۆمپانیاکان و خودی خۆشیان بە هۆکار دەزانن بەوەی هاوکار نین لە پاک ڕاگرتنی شەقام  و شوێنە گشتییەکان. 

 

ئەوەی پێویستە بیزانیت: ئیدارەی پێشووی کەرکوک گرێبەستی لەگەڵ چەند کۆمپانیایەک کردووە بۆ پاککردنەوەی شارەکە، بەڵام بە تەواوی کۆمپانیاکان تەنها 260 کرێکاریان هەیە، ئەمە جگە لە کۆنی ئامێر و ئۆتۆمبێلە کۆنەکان کە پێداویستی شارەکە پڕ ناکەنەوە.