نوێترین زانیاری لەبارەی ئامادەکردنی لیستی مووچە و داواکارییەکانی بەغدا

ئاڤا نیوز

ئامادەکردنی لیستی مووچەی مانگی یەک و لیستی خانەنشینان و داواکارییەکانی دیکەی بەغدا تاوەکو ئێستا تەواو نەبوون، بۆیە دەکەوێتە هەفتەی داهاتوو.

چیرۆکی سەرەکی: چوار ڕۆژە دوو شاندی حکومەتی عێراق لەبارەی مووچە لە هەولێرن، شاندێکیان گشتییە و هی وەزارەتی داراییە، شاندەکەی دیکەیان هی بەڕێوەبەرایەتیی گشتی خانەنشینی عێراقە. شاندەکان چەند ئەرک و ئامانجێکیان هەیە، سەرەکیترینیان هاوکاریکردنی وەزارەتی دارایی و ئابووریی کوردستانە بۆ ئامادەکردنی لیستی مووچەی مانگی یەک بە ئەلیکترۆنی و سیستەمی پەیرۆل کە دەکرێتە بنەما بۆ کۆی مانگەکانی ئەمساڵ.

لەگەڵ ئامادەکردنی دوو لیستی جیاواز بۆ خانەنشینان، لیستێکیان گشتییە و هی سەرجەم خانەنشینانی کوردستانە بە مەرجێک خانەنشینانی نوێی تێدا بێت، ئەوەی سێ تەمەن پێکەوە خانەنشین دەکرێت و 35 بۆ 37 هەزار فەرمانبەر دەگرێتەوە، لەگەڵ لیستێک بۆ ئەو خانەنشینانەی کۆتایی ئەمساڵ خانەنشین دەبن. ئەرکێکی دیکەی دوو شاندەکەش میزان موراجەعەیە، کە خەرجی سەرجەم وەزارەت و فەرمانگەکان دەگرێتەوە.

ئەوەی پێویستە بیزانیت: بڕیار بوو تاوەکو ئێوارەی ئەمڕۆ هەرسێ لیستەکە ئامادە بکرێن، ئەمەش بەپێی نووسراوێکی خێرای وەزارەتی دارایی کوردستان، چونکە بڕیار درابوو یەکشەممەی داهاتوو کە دەکاتە 26ی مانگ، جارێکی دیکە شاندی کوردستان و وەزارەتی دارایی عێراق کۆببنەوە، ڕێککەوتنێکی نوێ بکەن و بڕیار بدرێت ئەمساڵ مووچە و شایستە داراییەکانی هەرێمی کوردستان چۆن بنێردرێن، ئینجا چەند ڕاسپاردەیەک ئامادە بکرێن و ئاراستەی ئەنجوومەنی وەزیرانی عێراق و سوودانی بکرێن بۆ ئەوەی بڕیاری کۆتاییان لەبارەوە بدرێت.

زانیاریی تایبەت: بەپێی بەدواداچوونەکانی ئاڤا میدیا، تاوەکو ئێستا هیچ لیستێک بەتەواوی ئامادە نەکراون و تەواو نەبوون، هۆکاری دواکەوتنیشی بۆ داواکارییە زۆرەکانی بەغدا دەگەڕێتەوە، داوای شتی زۆر و وردەکاریی زۆریان کردووە لە کاتێکی زۆر کەمدا.

ئەوەی پێشبینی دەکرێت: بەپێی زانیارییەکانی وەزارەتی دارایی کە بە ئاڤا میدیای ڕاگەیاندووە،

- "ئەگەر بتوانرێت تاوەکو ئێوارەی ڕۆژی شەممە لیستەکان ئامادە بکرێن، ئەوا شەوی شەممە لە هەولێر کۆبوونەوەیەک دەکرێت و شاندی کوردستان و وەزارەتی دارایی وەکو ئامادەکارییەک بۆ کۆبوونەوەکەی ڕۆژی یەکشەممە کۆدەبنەوە، بەڵام ئەگەر لیستەکان و داواکارییەکانی بەغدا تەواو نەبوون، ئەوا کۆبوونەوەی ڕۆژی یەکشەممە ناکرێت و دوادەخرێت بۆ ڕۆژێکی تر.

- ئاڤا ئەوەشی زانیوە لە کۆبوونەوەکەدا ئەو دوو شاندەی عێراق کە ئێستا لە کوردستانن بەشدار دەبن.

- دواکەوتنی کۆبوونەوەکە دەبێتە هۆی دواکەوتنی ناردنی مووچەی مانگی یەک، چونکە تاوەکو ڕێککەوتنی نوێ نەکرێت یەک دینار بۆ مووچە نانێردرێت.