مامۆستایانی گرێبەست داوا دەکەن شایستەی دارایی مانگەکانی حەوت و هەشتیان بۆ خەرج بکرێ

ئاڤا نیوز

مامۆستایانی گرێبەست لەڕێگەی ئاڤاوە داوا دەكەن شایستەی دارایی مانگەكانی حەوت و هەشتی ساڵی ڕابردوویان بۆ خەرج بكرێت كە ئەو كات وانەبێژ بوون، نوێنەرەكەشیان دەڵێت: چەندین جار بەدواداچوونمان كردووە و بەڵێنمان پێدراوە، كەچی تا ئێستا شایستەکانمان خەرج نەكراوە.

وێنە گەورەكە: مامۆستایانی گرێبەست لە سنووری پارێزگاكانی سلێمانی و هەڵەبجە و هەردوو ئیدارەی ڕاپەڕین و گەرمیان، شایستەی دارایی مانگەكانی حەوت و هەشتی ساڵی پاریان پێدراوە، بەڵام مامۆستایانی گرێبەست لە سنووری پارێزگاكانی هەولێر و دهۆك و ئیدارە سەربەخۆكانی سۆران و زاخۆ كە ژمارەیان زیاتر لە 25 هەزارە مامۆستایە، تا ئێستا وەریان نەگرتووە.  

لێدوانی فەرمی: عەلى ڕەئووف، نوێنەرى گشتىی مامۆستایانى گرێبەست تایبەت بە ئاڤا میدیای ڕاگەیاند: ئەگەر ئەم هەفتەیە دابەش نەکرێت، بەشێوەیەكی مەدەنی ناڕەزایی دەردەبڕین. هاوکات وەك نوێنەری مامۆستایانی گرێبەست داوا لە ئاڤا میدیا دەكەین دەنگمان بگەیێنن.

زانیاریی بەدەستهاتوو: ئاڤا لە سەرچاوەیەكی تایبەت زانیویەتی، وەزارەتەکانی پەروەردە و دارایی ڕەزامەندییان لەسەر خەرجکردنی دەربڕیوە و ڕێكارەكانیش كراون، پرسەكە ئێستا لە گەنجینەكانی پارێزگاكانی هەولێر و دهۆكە.

باكگراوند: سەرۆكوەزیران مەسرور بارزانی لەرێکكەوتی 25-8-2024 بڕیاری دا سه‌رجه‌م وانه‌بێژان بكرێنه‌ گرێبه‌ست کە ژمارەیان نزیکەی 38 هەزارە کەس بوو، دواتر مووچەی مانگەكانی (9، 10، 11)ـەیان وەك مامۆستای گرێبەست وەرگرت.