ساڵی ڕابردوو وەزارەتی ڕۆشنبیری هیچ پارەیەکی بۆ چالاکی هونەری تەرخان نەکردووە

 

ئاڤا نیوز

هەرچەندە لە سەرجەم هەرێمی کوردستان چەندین چالاکیی هونەریی و لە نێویشیاندا چالاکیی تایبەت بە فیلم و سینەما بەرێوەچوو، بەڵام "وەزارەتی ڕۆشنبیریی بۆ ساڵی 2024 هیچ پارەیەکی بۆ چالاکییەکان تەرخان نەکردووە.

چیرۆکی سەرەکی: ساڵی 2024 لە هەرێمی کوردستان چەندین چالاکی هونەریی لە نێویشیاندا چالاکیی تایبەت بە فیلم وسینەما هەبوون، بێ ئەوەی پارەی بۆ تەرخان بکرێت.

لێدوانی فەرمی: شاخەوان مستەفا، بەڕێوەبەری سینەمای هەولێر بە ئاڤا میدیای گوت: وەک بەڕێوەبەرایەتی سینەما چالاکیمان زۆربووە، بەتایبەت لە کۆتایی ساڵدا و بە پاڵپشتی پارێزگای هەولێر، لە دیارترین چالاکیشمان، نمایشکردنی فیلمی هونەرمەندانی چوار پارچەی کوردستان بووە و ڕێزمان لە هونەرمەندانی بەشداربوو گرتووە.

گوتیشی بۆ ساڵی 2025، 15 پڕۆژەمان بۆ وەزارەت پێشنیاز کردووە و کە لەمساڵدا جێبەجێیان بکەین لەوانە، وەرگێڕانی کتێبی سینەمایی و بەرهەمهێنانی فیلمی درێژ و کورت و ڕێکخستنی فێستیڤاڵ و زۆر کاری دیکەش.