ئۆکراینا: سەربازانی کۆریای باکوور لە سەنگەرەکانی شەڕکردن دەکشێنەوە

ئاڤا نیوز

چەند هەفتەیەکە سەربازانی کۆریای باکوور لە بەرەکانی پێشەوەی جەنگ لە دژی ئۆکراینا دەستیان بە کشانەوە کردووە، بەپێی سەرچاوەکان زیانێکی زۆری گیانی لە ڕیزەکانی سەربازانی کۆریای باکور هەیە.

وێنە گەورەکە: بە فەرمانی کیم جۆن ئون، سەرۆکی کۆریای باکوور، بە هەزاران سەربازی ئەو وڵاتە نێردراونەتە ڕووسیا بۆ ڕووبەڕبوونەوەیان دژ بە سەربازانی ئۆکراینا و یەکلاییکردنەوەی جەنگ لە سوودی ڕووسیا.

لێدوانی فەرمی: ئۆلێکساندر کیندرەتنکۆ وتەبێژی هێزەکانی ئۆپەراسیۆنە تایبەتەکانی سوپای ئۆکراینا ڕایگەیاند: ماوەی نزیکەی سێ هەفتەیە سەربازانی کۆریای باکور لە بەرەکانی جەنگ نابینرێن و پێدەچێت بەهۆی زیادبوونی کوژران و بریندار بوونیان لە جەنگەکەدا بڕیاری کشانەوەیان دابێت.

زانیاری زیاتر: بەپێی ڕاپۆرتە سەربازییەکان،  12 هەزار سەربازی کۆریای باکوور ڕەوانەی ڕووسیا کراون،  نزیکەی چوار هەزار لەو سەربازانە کوژراون یان بریندار بوون.

باکگراوند: بەپێی سەرچاوەکان سەربازانی کۆریای باکوور بە باشی ڕاهێنانیان لەسەر شەڕی درۆنەکان پێکراوە و سەرەڕای زیانەکانیان ڕووسیا ئەو سەربازانە وەک هێزی پیادە لە ناوچەی کۆرسک بەکاردەهێنێت.