سندووقی نەختینەی نێودەوڵەتی هۆشداری دەداتە عێراق

ئاڤا نیوز

سندووقی نەختینەی نێودەوڵەتی ڕایگەیاند پێویستە لەسەر عێراق هەناردەی نا نەوتی زیاد بکات، بۆ ئەوەی   ڕێگە بگرێت لە شۆکی ئابووریی کە ڕەنگە بەهۆی دابەزینی نرخی نەوتەوە تووشی ببێت.

ڕاگەیێنراوی فەرمی: سندوقی نەختی نێودەوڵەتی ڕایگەیاند: دابەزینی گەورە لە نرخی نەوت، یاخوود درێژکردنەوەی ئاستی بەرهەمهێنانی نەوتی ئۆپیک پڵەس، کاریگەریی لەسەر حساباتی دارایی و دەرەکیی عێراق دەبێت.

بۆچی گرنگە: عێراق زۆرینەی داهاتەکەی پشتی بە داهاتی نەوت بەستووە، سندووقی نەختینەی نێودەوڵەتی ئامۆژگاری دەکات سەرنجی لەسەر گەشەی نا نەوتی بێت و هەوڵیش بدات بەرهەمی دیکە گەشە پێبدات.

ئەوەی پێویستە بیزانیت: ئەو هۆشداری و ئامۆژگارییەی سندوقی نەختینەی نێودەوڵەتی لەمیانی سەردانی ڕۆژی 20 تا 29 ی شووباتی نێردەکەیان بووە بۆ عەمان، لەوێ چاویکەوتووە بە ژمارەیەک بەرپرسی عێراقی.

ئەوەی پێشبینی دەکرێت: چەند دەزگایەکی پەیوەست بە لێکۆڵینەوەی دارایی و نەوت، پێشبینی دەکەن بەهۆی ناکۆکییەکانی ڕۆژهەڵاتی ناوەڕاست نرخی نەوت بەشێوەیەکی بەرچاو دادەبەزێت، بەڵام بەشێکیان پێیان وایە بەرز دەبێتەوە.

ئەوەی ئێستا ڕوودەدات: ئەمڕۆ نرخی بەرمیلێک نەوتی برێنت لەجیهان بە 83 دۆلار و 55 سەنت مامەڵەی پێوەکرا، نەوتی خاوی تێکساسیش بە 79 دۆلار و 97 سەنت.