فەرمانبەران لەکاتی وەرگرتنی پارەی دڕاو لە "ئەی تی ئێم"ــەکان چی بکەن؟

ئاڤا نیوز 

 

چەند فەرمانبەرێک پارەی دڕاو لە "ئەی تی ئێم"ـەکان وەردەگرن و تیمی "هەژماری من" هەنگاوەکانی دوای ئەو حاڵەتە دیاری دەکات.

 

چیرۆکی سەرەکی: لەکاتی وەرگرتنی مووچەی مانگی یەکی مووچەخۆرانی هەرێمی کوردستان، چەند مووچەخۆرێک پارەی دڕاویان لە "ئەی تی ئێم"ــەکانەوە وەرگرتووە، تیمی "هەژماری من"ــیش دڵنیایی دەدات لەوەی پارەکانیان نافەوتێت.

 

لێدوانی فەرمی: ڕێبین کامەران، بەڕێوەبەری پەیوەندییەكانی 'پڕۆژەی هەژماری من' بە ئاڤا میدیای ڕاگەیاند: ئەو پارانەی لە "ئەی تی ئێم"کاندا هەیە، ڕاستەوخۆ لە بانکی ناوەندیی عێراقەوە دێن و حاڵەتی دڕانیان تێدا هەیە، بۆیە مووچەخۆرەکە دەتوانێت ڕۆژی دواتر سەردانی ئەو بانکە بکات کە مووچەی لێ وەردەگرێت و پارەکە بگۆڕێت، بەمەش پارەکانیان نافەوتێت.

 

ئەوەی پێویستە بیزانیت: بۆ مووچەی مانگی شوبات، 275 هەزار کەس مووچەکانیان لەڕێگەی "هەژماری من" وەردەگرن، کە 216 هەزار و 500 فەرمانبەری مەدەنی و 56 هەزار و 700 پێشمەرگەن.

 

ئەمەش بزانە: لە سەرجەم پارێزگاکانی هەرێمی کوردستان، زیاتر لە 550 "ئەی تی ئێم" لە 200 شوێنی جیاواز دانراون، تاوەکو ئێستاش 720 هەزار کەس لە "هەژماری من" تۆمار کراون.

 

بۆچی گرنگە: بە ئامانجی هێنانەکایەی ئاسانکاری زیاتر بۆ هاونیشتمانیان، هەرێمی کوردستان لە پتەوکردنی ژێرخانی بە دیجتاڵیکردن بەردەوامە و حکومەت دەیەوێت سەرجەم مووچەخۆران لە ڕێگەی "هەژماری من"ـەوە مووچەکانیان وەربگرن.