پارێزگاری هەولێر ڕوونکردنەوە لەسەر خۆپیشاندەرانی سلێمانی دەدات

ئاڤا نیوز

بەهۆی نەبوونی مۆڵەتی فەرمی خۆپیشاندان، ڕێگری لە بەشێک لە خۆپیشاندەرانی سلێمانی کرا کە بە نیاز بوون بێنە هەولێر خۆپیشاندان بکەن.

چیرۆکی سەرەکی: ئەمڕۆ بەشێک لە خۆپیشاندەرانی سلێمانی ویستیان ڕێڕەوی خۆپیشاندانەکانیان بگۆڕن بۆ شاری هەولێر، پارێزگاری هەولێریش وەڵامی دانەوەو بە بیانووی داوانەکردنی مۆڵەتی فەرمی خۆپیشاندان، ڕێگریان لێ کراوە. وەزارەتی ناوخۆش دەڵێت دەستێکی دەرەکی لە پشت خۆپیشاندەرانە بۆ تێکدانی ئارامی وئاسایشی هەولێر.

لێدوانی فەرمی: ئۆمێد خۆشناو، پارێزگاری هەولێر، لە گەشتی هەواڵەکانی سەعات 07:00ـی ئاڤا میدیا بەشداریکرد و ڕایگەیاند: ڕێز و پێزانینمان بۆ خۆپیشاندەران لە هەموو هەرێمی کوردستان هەیە، بەڵام نەدانی مووچە و ئەو غەدرەی لە فەرمانبەران دەکرێت لە بەغداوە لە ئێمە و فەرمانبەران دەکرێت، بابەتی مووچە لە کارە هەرە لە پێشینەکانی حکومەتی هەرێمی کوردستانە و بەردەوام سەرۆکایەتی حکومەتی هەرێمی کوردستان و تیمەکان لەسەر هێڵن بۆ چارەسەرکردنی کێشەکانی مووچە.

زانیاریی زیاتر: ئێمە ڕێز لە مانگرتووان ناو خێمەکە دەگرین، بەڵام لە پشت خێمەکە شتێکی دیکە دەگوزەرێت و پلان دژی هەرێمی کوردستان دادەنرێت، ئەگەر ڕاستدەکەن بابێن هەمووان دەست لەناودەست دژی ستەمەکانی بەغدا ڕاوەستین مافەکانمان بەدەست بهێنین، هاوکات خۆپیشاندان بە یاسا ڕێکخراوە، بەڵام کەس داوای خۆپیشاندانی نەکردووە، ئەوانەی هاتوون هیچ مۆڵەتییان نەبووە، بۆیە ڕێگرییان لێکراوە.

چی ڕوودەدات: پارێزگاری هەولێر، دەڵێت: بەشێک لە ئەندام پەرلەمانەکانی عێراق کە بەردەوام دژی هەرێمی کوردستان کاردەکەن بۆ بەرژەوەندی خۆیان مانگرتووان و خۆپیشاندەران بەکاردەهێنن، پەیامەکەی وەزارەتی ناوخۆش ڕوونە کە پەکەکە و هەندێک لایەنی عێراقی لە پشت خۆپیشاندانەکەن و  نیازی تێکدانی ئاسایشی هەولێریان هەبووە.