نێچیرڤان بارزانی وادەی هەناردەکردنەوەی نەوت ئاشکرا دەکات

 

ئاڤا نیوز

نێچیرڤان بارزانی، زانیاری نوێ لەبارەی هەناردەکردنەوەی نەوتی کوردستان ئاشکرا دەکات و دەڵێت، لە هەرێمی کوردستان هەموو شتێک ئامادەیە، لە ڕۆژانی داهاتووشدا لەگەڵ تورکیا لە هەولێر کۆبوونەوەیەک دەکەن، پێشبینیش دەکات هەناردەکردنەوەی نەوت دوو مانگی دیکە بخایەنێت.

وێنە گەورەکە: دوای هەموارکردنەوەی دوو بڕگەی یاسای بودجەی عێراق کە پەیوەست بوون بە هەناردەکردنەوەی نەوتی کوردستان  لە مانگی یەکی ئەمساڵەوە، لە کوردستان و عێراق و تورکیا دەست بە ڕێکارەکانی پرۆسەکە کراوە،  کە نزیکەی دوو ساڵە وەستاوە.

لێدوانی فەرمی: نێچیرڤان بارزانی، سەرۆکی هەرێمی کوردستان لە چاوپێکەوتندا لەگەڵ ئاژانسی بلومبێرگی ئەمریکی  دەڵێت:

٠ بەم زووانە ئەگەری هەناردەکردنەوەی نەوتی هەرێمی کورستان هەیە، پێشبینیی دەکەین بکەوێتە کۆتایی مانگی چواری ئەمساڵ.

٠ لە چەند ڕۆژی داهاتوودا بۆ تاوتوێکردنی پرسی هەناردەکردنەوەی نەوت لەگەڵ بەرپرسانی تورکیا لە هەولێر کۆدەبینەوە.

٠ لای ئێمەوە هەموو شتێک ئامادەیە بۆ هەناردەكردنەوەی نەوت.

٠ دانوستانی زیاتر لەگەڵ بەغدا دەریدەخات ڕۆژانە چەند نەوت بۆ بەکاربردنی ناوخۆ لە هەرێمی کوردستان دیاری دەکرێت.

باکگراوند: لە ڕێکەوتی 2023-03-25ـەوە، لەسەر داوای حکومەتی عێراق و بە بڕیاری دادگای ناوبژیوانی پاریس هەناردەی نەوتی کوردستان بۆ بەندەری جەیهانی تورکیا وەستاوە، ئەمەش زیاتر لە 25 ملیار دۆلار زیانی بە ئابووریی کوردستان و عێراق گەیاندووە.