حەماس تەرمی چوار بارمتە ڕادەستی ئیسرائیل دەکاتەوە

ئاڤا نیوز

ئەمڕۆ پێنجشەممە، لە چوارچێوەی قۆناغی یەکەم، بزووتنەوەی حەماس تەرمی چوار بارمتەی ئیسرائیلی ڕادەست دەکاتەوە.

چیرۆکی سەرەکی: ئەمڕۆ پێنجشەممە، گەڕی حەوتەم لە چوارچێوەی قۆناغی یەکەمی ئاگربەستی نێوان ئیسرائیل و حەماس بەڕێوەدەچێت، ئەم جارە تەرمی بارمتەکان ڕادەست دەکرێن.

ڕاگەیێنراوی فەرمی: بزووتنەوەی حەماس ڕایگەیاند: ''بەپێی مەرجەکانی ئاگربەست ئەمڕۆ پێنجشەممە تەرمی چوار بارمتە ڕادەست دەکەینەوە، ئەوان لە ژیاندا بوون کاتێک بە بارمتە گیران، بەڵام بەهۆی بۆردوومانەکانی ئیسرائیل کوژران''.

لەلایەکی دیکەوە: دوێنێ بنیامین نەتانیاهۆ، سەرۆکوەزیرانی ئیسرائیل ڕایگەیاند: ''سبەی ڕۆژێکی سەخت دەبێت بۆ ئیسرائیل، ئیسرائیل ماتەم دەگێڕێت و تەرمی بارمەتەکانمان وەردەگرینەوە''.

زانیاریی زیاتر: حەماس تەرمی خێزانی بیباس و تەرمی عوديد ليفشتس ڕادەستی ئیسرائیل دەکاتەوە، سەرەتای هەفتەی داهاتووش تەرمی شەش بارمتەی دیکە ڕادەست دەکاتەوە.

باکگراوند: لە 2025-01-19، بە نێوەندگیری میسر، قەتەر و ئەمریکا، ئاگربەست لە نێوان ئیسرائیل و حەماس کەوتە بواری جێبەجێکردنەوە کە سێ قۆناغ لەخۆدەگرێت، هەریەکەیان 42 ڕۆژ دەخایەنێت، بەڵام ئیسرائیل دەستپێکردنی دانوستانەکان بۆ قۆناغی دووەم دوادەخات.