هاتووچۆی هەڵەبجە شۆفێران لە مەترسی شەختەی ڕێگاكان ئاگاداردەكاتەوە

ئاڤا نیوز

هاتووچۆی هەڵەبجە شۆفێران ئاگادار دەكەتەوە لەوەی ڕێگای نێوان زەردەهاڵ بۆ ناحیەی بیارە-تەوێڵە بەهۆی دابەزینی پلەكانی گەرما بۆ ژێر سفری سەدی، یەكپارچە بووەتە شەختە و هاتووچۆكردن لەو شەقامە ئەستەم بووە.

وێنە گەورەكە: شەپۆلێكی سەختی سەرما و سۆڵە و بەفربارین تەواوی ناوچەكانی هەرێمی كوردستانی گرتووەتەوە كە ماوەی چەندین ساڵە وێنەی نەبووە، بەجۆرێک؛ پلەكانی گەرما لە زۆربەی ناوچەكان بۆ خوار سفری سەدی دابەزیوە و بەفر لە ناوچە شاخاوییەكان كەڵەكەبووە، بەم هۆیەوە پەروەردەی چەند شوێنێک ئەمڕۆیان كردووەتە پشوو و دەرگای قوتابخانەكان داخراون.

 

ڕاگەیێنراوی فەرمی: بەشی ڕاگەیاندنی بەڕێوەبەرایەتیی هاتووچۆی پارێزگای هەڵەبجە، ئاگادارینامەیەكی بڵاوكردووەتەوە و تێیدا شۆفێران ئاگاداردەكاتەوە لەوەی ڕێگای زەردەهاڵ بۆ شارەدێی بیارە - تەوێڵە ناوچەی گەشتیاری ئاوێسەر تا مەرزەکە بەهۆی کەشی ساردی ناوچەکە و دابەزینی پلەکانی گەرما بۆ خوار سفری سەدی، بووەتە یەکپارچە شەختەبەند و تەواوی ڕێگاکە  بەستوویەتی، هاتووچۆی ئۆتۆمبێلی ئەستەم كردووە.

 

ئەوەی پێویستە بیزانیت: هاتووچۆی هەڵەبجە داوا لە شۆفێران دەكات بۆ سەلامەتی گیانی خۆیان و دووركەوتنەوە لە مەترسی ڕووداوی هاتووچۆ، پابەندی ڕێنماییەكان بن و تا دەتوانن نەچنە ئەو ڕێگایە.