فایلی خەڵک؛ ئاڤا بەدواداچوون لەبارەی ڕاگرتنی هاوکاریی لیوا هاوبەشەکان دەکات

 

ئاڤا نیوز

ژمارەک پێشمەرگەی سەر بە فەوج و لیوا هاوبەشەکان، کە فەرماندەکانیان گۆڕاون، بێ بەش بوونە لە هاوکارییەکانی هاوپەیمانان.

چیرۆکی سەرەکی: ئەو فەوج و لیوا هاوبەشانەی فەرماندەکانیان گۆڕاوە ماوەیەکە هاوپەیمانان هاوکارییەکانی ڕاگرتوون، 430 کەس لەو پێشمەرگانەی سەر بەو لیوا هاوبەشانە داوایان لە ئاڤا کردووە بەدواداچوونیان بۆ بکات.

لێدوانی فەرمی: لیوا بەختیار محەممەد، ئەمینداری گشتیی وەزارەتی پێشمەرگە بە ئاڤا میدیای ڕاگەیاند، کێشەکەیان بەرەو چارەسەر بوونە، وەزارەت فەرماندەی بۆ فەوج و لیواکان دیاریکردووە و بڕیاریشی لەسەر داوە، بەڵام هاوپەیمانان  وردبینی ئەمنی بۆ ئەو ناوانە ئەکەن، وردبینییەکەش مانگێک تا سێ مانگ ئەخایەنێت.

گوتیشی، هەرکاتێک وردبینییەکەی هاوپەیمانان تەواو بوو، ئەو کاتە هاوکارییەکە خەرج دەکرێتەوە، بەڵام قەرەبووی ڕاگرتنی هاوکارییەکە لەو ماوەیەدا ناکرێتەوە.

زانیاریی زیاتر: وەزارەتی پێشمەرگە، بۆ دووبارە نەبوونەوەی ئەم حاڵەتانە، لەمەولا پێش گۆڕینی فەرماندەکان، ناوەکان بۆ هاوپەیمانان دەنێرێت، بۆ ئەوەی وردبینی بۆ بکەن، دواتر گۆڕانکاری دەکات.