ڕووسیا دەست بە پرۆژەکانی لەبواری نەوت لە کوردستان دەکاتەوە

 

ئاڤا نیوز

وەزیری وزەی ڕووسیا ڕایدەگەیێنێت، هەرێمی کوردستان و حکومەتی فیدراڵ بە سەرکەوتوویی ناکۆکییەکانی نەوتیان یەکلایی کردووەتەوە، ئەمەش دەرفەت بە کۆمپانیا ڕووسییەکان دەدات دەست بە پڕۆژەکانیان لە ناوچەکە بکەنەوە.

وێنە گەورەکە: بە دەستپێکردنەوەی هەناردەی نەوتی کوردستان، کۆمپانیای ڕووسنەفتی ڕووسی کە خاوەنی  60%ـی بۆری هەناردەکردنی نەوتی هەرێمی کوردستانە دەست بەکارەکانی دەکاتەوە.

لێدوانی فەرمی: سێرگی تسڤێلێڤ، وەزیری وزەی ڕووسیا، بە ئاژانسی تاسی ڕووسیای ڕاگەیاند: هەرێمی کوردستان و حکومەتی فیدراڵ بە سەرکەوتوویی ناکۆکییەکانی نەوتیان یەکلایی کردووەتەوە، ئەمەش ڕێگە بە کۆمپانیا ڕووسییەکان دەدات پڕۆژەکانیان لە ناوچەکە دەستپێبکەنەوە.

لە لایەکی دیکەوە: چوارشەممە 2025-02-26، حەییان عەبدولغەنی، وەزیری نەوتی عێراق ڕایگەیاند: لەگەڵ هەرێمی کوردستان لەبارەی بەگەڕخستنەوەی بۆڕیی نەوتی بەندەری جەیهان گەیشتوون بە ڕێککەوتن و ئاماژەی بۆ ئەوەش کرد، زنجیرەیەک كۆبوونەوەمان لەگەڵ وەزارەتی سامانە سروشتییەكانی حكومەتی هەرێمی كوردستان كردووە و لێكگەیشتنی بەرهەمدار و گرنگییان هەبووە.

بە تەنیشت ئەو بابەتەوە: چوارشەممە 2025-02-26، محەممەد شیاع سوودانی، سەرۆکوەزیرانی عێراق، پێشوازی لە سێرگی تسیڤلێڤ، وەزیری وزەی ڕووسیا کرد و تاوتوێی بوارەکانی هاوکاری هاوبەشی دوولایەنەو بە دیاریکراویش لە بواری وزە و کەرتی نەوتدا کرد.