وەزارەتی دەرەوەی تورکیا باڵیۆزی ئێران لە ئەنقەرە بانگهێشت دەکات

ئاڤا نیوز

وتەبێژی وەزارەتی دەرەوەی تورکیا ڕایگەیاند، بەرپرسی کاروباری باڵیۆزخانەی ئێران لە ئەنقەرە بانگهێشتی وەزارەتەکەیان کراوە، ئەمەش بەهۆی ئەوەی ماوەیەکە بەرپرسانی ئێران هەندێک دەنگۆیان سەبارەت بە تورکیا بڵاوکردووەتەوە.

ئەوەی پێویستە بیزانیت: لە کۆبوونەوەکەدا پرسە دووقۆڵییەکان تاوتوێ کران، هەروەها ئەو تۆمەتانە باس کران کە بەرپرسانی ئێران لە دژی تورکیا بڵاویان کردووەتەوە.

لێدوانی فەرمی: ئۆنجو کەچێلی، وتەبێژی وەزارەتی دەرەوەی تورکیا ڕایگەیاند:

- لەگەڵ ئێران گرنگییەکی زۆر بە پەیوەندییەکانمان دەدەین، بەردەوام لەگەڵ بەرپرسانی ئێران کۆدەبینەوە و بیروڕا ئاڵوگۆڕ دەکەین. لەو چوارچێوەیەدا بەرپرسی کاروباری باڵیۆزخانەی ئێران لە ئەنقەرەمان بانگهێشتی وەزارەت کرد.

- تورکیا پێی وایە لە هەر حاڵەتێکدا نابێت پرسەکانی سیاسەتی دەرەوە وەک بابەتێک بۆ سیاسەتی ناوخۆیی بەکاربهێنرێن، لەم چوارچێوەیەدا ئێمە پێمان باشە پەیامی ڕەخنەگرانەی پێویست، ڕاستەوخۆ بگەیەنین بەو  وڵاتەی کە گلەییمان لێی هەیە.

باکگراوند: هەنگاوەکەی تورکیا دوای ئەوە دێت بەهۆی لێدوانێکی هاکان فیدان، وەزیری دەرەوەی تورکیا کە هۆشداری دایە ئێران و وتی تاران نابێت سەقامگیری سووریا تێکبدات.