ئاڤا هۆکاری گرانبوونی نرخی بەنزین لە هەولێر ئاشکرا دەکات

ئاڤا نیوز

چەند ڕۆژێکە نرخی بەنزین و گازی بازرگانی لە بەنزینخانەکانی هەولێر بەرزبووەتەوە و لە بەشێکی بەنزینخانەکان نرخی هەر لیترێک بەنزینی نۆرماڵ 50 بۆ 100 دیناری چووەتە سەر.

چیرۆکی سەرەکی: لە 24 کاتژمێری ڕابردوودا لە بەشێکی بەنزینخانەکانی هەولێر نرخی بەنزینی نۆرماڵ بە کوالێتی باش 860 دینار تاوەکو 950 دینارە، بەهەمانشێوە نرخی بەنزینی موحەسەن و گازیش بەرز بووەتەوە.

لێدوانی فەرمی: سیروان عەبدوڵڵا، سەرۆکی لیژنەی بەنزینخانەکانی هەولێر، بە ئاڤای ڕاگەیاند: لیتری بەنزین لەو کۆمپانیانەی کە بەبەنزینخانەکانی دەفرۆشێت 50 دینار هاتووەتە سەر، بەشێکی پەیوەندی دەستپێکردنەوەی هەناردەی نەوتی هەرێمی کوردستانە، چونکە مەوادی خام لە بازاڕ کەمدەبێتەوە و بەنزینخانەکان بڕێکی زیاتر لە بەنزینی پێویستیان کڕیوە، بەمەش نرخەکەی بەرزبووەتەوە."

لەلایەکی دیکەوە: دوو ڕۆژ پێش ئێستا نرخی هەر لیترێک گاز 600 بۆ 610 دینار بوو، ئێستا نرخی ئەویش بەرزبووەتەوە هەر لیترێک لە نێوان ئێستا 610 بۆ 620 دینارە.

ئەمەش بزانە: لە سەنتەری شاری هەولێر و دەوروبەری 260 بەنزینخانە هەن ، لەو ژمارەیە ڕۆژانە 25 بۆ 30 بەنزینخانە بەنزین بە نرخی پاڵپشتی کراوی حکومی دەفرۆشن، کە بۆ هەر لیترێک بە 750 دینار بە شوفێران دەدرێت.