ئەحمەد شەرع پەیوەست بە گرژییەکانی سووریا لیژنەیەکی لێکۆڵینەوە پێکدەهێنێت

ئاڤا نیوز

بەمەبەستی لێکۆڵینەوە لە هۆکاری گرژییەکانی چەند ڕۆژی ڕابردوو و ئەو پێشێلکارییانەی بەرامبەر هاووڵاتیانی مەدەنی کراون، سەرۆککۆماری سووریا بۆ قۆناغی ڕاگوزەر لیژنەیەکی "سەربەخۆ و نیشتیمانی" پێکهێنا.

وێنە گەورەکە: ماوەی چوار ڕۆژە شەڕ و پێکدادانەکان لە نێوان سوپای سووریای نوێ و پاشماوەی چەکدارانی سەر بە بەشار ئەسەد لە لازقییە و تەرتوس بەردەوامە و تاوەکو ئێستا بە هۆیەوە بە سەدان کەس کوژراون.

ڕاگەیێنراوی فەرمی: سەرۆکایەتی کۆماری سووریا بڕیارێکی ئەحمەد شەرع سەرۆککۆماری سووریای بۆ قۆناغی ڕاگوزەر بڵاوکردەوە، بەگوێرەی بڕیارەکەش لیژنەیەکی سەربەخۆ لە حەوت دادوەر و پارێزەر و ئەفسەر پێکدەهێنرێت و لێکۆڵینەوە لە هۆکار و چۆنییەتی دەستپێکردنی گرژییەکان دەکات.

لیژنەکە لێکۆڵینەوە لەو پێشێلکارییانەش دەکات کە هاووڵاتیانی مەدەنی، دامەزراوە گشتییەکان، هێزە ئەمنییەکان و سوپا لەو چوار ڕۆژەدا ڕووبەڕووی بوونەتەوە و لایەنی بەرپرسیش دیاری دەکات، لیژنەکە پێویستە لە ماوەی 30 ڕۆژدا کارەکانی تەواو بکات و ڕاپۆرتی خۆی بۆ سەرۆکایەتی کۆمار بەرزبکاتەوە.