وەزیری بەرگری ئیسرائیل بۆ شەرع: تۆ لە ژێر چاودێری دایت

ئاڤا نیوز

وەزیری بەرگری ئیسرائیل چەند پەیامێکی ناڕاستەوخۆی بۆ ئەحمەد شەرع، سەرۆکی سووریا بۆ قۆناغی ڕاگوزەر نارد و پێی گوت تۆ لە ژێر چاودێری ئیسرائیل دایت.

وێنە گەورەکە: ئیسرائیل هێزەکانی لە چیای حەرمون جێگیر کردووە و بە ناوچەی ئەمنی دادەنێت، بەبیانووی پاراستنی دروزییەکان، بەڵام دوێنێ ئەحمەد شەرع، سەرۆکی سووریا بۆ قۆناغی ڕاگوزەر رێککەوتنێکی لەگەڵ دروزییەکان ئیمزاکرد، بەپێی رێککەوتنەکە ئەو چەکدارانەی کە سەر بە دروزییەکان بوون لە پارێزگای سوەیدا دەبنە بەشێک لە وەزارەتی ناوخۆی سووریا.

لێدوانی فەرمی: ئیسرائیل کاتز، وەزیری بەرگری ئیسرائیل ڕایگەیاند: ''هەموو بەیانییەک کاتێک ئەحمەد شەرع چاوەکانی دەکاتەوە دەبێت هێزەکانی ئیسرائیل لە چیای حەرمون ببینێت و لە بیر نەکات کە ئێمە لە وێ دەمێنینەوە''.

زانیاری زیاتر: ئەم لێدوانەی کاتز دوای ئەوە دێت کە پێشتریش هەڕەشەی لە حکومەتی نوێی سووریا کرد و پێی ڕاگەیاندن، ئەگەر زیان بە دروزییەکان بگەیێنن زیانتان پێدەگەیێنین.

باکگراوند: لە دوای ڕووخانی بەشار ئەسەد، سەرۆکی پێشووی سووریا لە ساڵی ڕابردوو، ئیسرائیل ئەمەی بە دەرفەت زانی تەواوی چیای حەرمون و ناوچەی پارێزراوی لە سووریا داگیر کرد.