هێرشی حووسییەکان بۆ سەر ئیسرائیل دەستیپێکرد

 

ئاڤا نیوز

حووسیەکانی یەمەن دەستپێکردنەوەی هێرشەکانیان بۆ سەر کەشتییە ئیسرائیلییەکانی ڕاگەیاند، ئەمەش دوای تەواوبوونی ئەو وادەیەی کە بە ئیسرائیلی دابوو بۆ ڕێگەدان بە هاوکاریکردن بۆ ناو کەرتی غەززە

چیڕۆکی سەرەکی: دوای کۆتاییهاتنی قۆناغی یەکەمی ئاگربەستی غەززە ئیسرائیل بە فەرمانی بنیامین نەتانیاهۆ، سەرۆکوەزیرانی وڵاتەکە سەرجەم هاوکارییە مرۆییەکانی بۆ غەززە ڕاگرت، کە بەشێک بوو لە بنەمای ڕێککەوتنی ئاگربەست لەنێوان ئیسرائیل و حەماسدا، دواجار بەهۆی ئەم گەمارۆییە حووسییەکانی یەمەن هۆشدارییان بە ئیسرائیلدا ئەگەر ڕێگە بە چوونەژوورەوەی هاوکارییەکان نەدرێت ئەوا هێرش دەکرێتە سەر ئیسرائیل.

لێدوانی فەرمی: یەحیا سەریع، وتەبێژی حووسییەکان ڕایگەیاند، حووسییەکانی یەمەن دەستیان کردووە بە هێرشکردنە سەر سەرجەم کەشتییە ئیسرائیلییەکان لە ناوچەی ئۆپەراسیۆنە دیاریکراوەکان، هاوکات ئەم هێرشانە بەردەوامیان دەبێت  تا ئەو کاتەی دەروازەکان بۆ چوونەژوورەوەی هاوکارییە مرۆییەکان و پێداویستی خۆراک بۆ کەرتی غەززە دەدرێت.

زانیاریی زیاتر: گفتۆگۆکان بۆ قۆناغی دووەمی ئاگربەست بەشێوەیەکی فەرمی لەنێوان ئیسرائیل و حەماس دەستیپێنەکردووە، ئەمەش لە کاتێکدایە کە دوو هەفتەیە قۆناغی یەکەمی ئاگربەست لە غەززە کۆتاییهاتووە.