نەتەوە یەكگرتووەكان: ئیسرائیل دەستدرێژیی كردووەتە سەر بەندكراوەكان

ئاڤا نیوز

نەتەوەیەكگرتوەكان ڕاپۆرتێكی سەبارەت بە مامەڵەی سەربازانی ئیسرائیل لەگەڵ بەندكراوە فەڵەستینییەكاندا ئامادە كردووە. هێشتا ڕاپۆرتەكە بە فەرمی بڵاو نەكراوەتەوە، بەڵام میدیاكان توانیویانە بەشێكی ببینن. بە گوێرەی ڕاپۆرتەكە مامەڵەی ئیسرائیل لەگەڵ بەندكراوەكاندا ناشایستەیە.

وێنە گەورەكە: ڕاپۆرتەكە لەلایەن ئاژانسێكی نەتەوە یەكگرتووەكان بۆ گەیاندنی یارمەتیی مرۆیی بە ئاوارە فەلەستینییەكان لە غەززە، ئونروا، ئامادە كراوە. بۆ ئامادەكردنی ڕاپۆرتەكە چاوپێكەوتن لەگەڵ زیاتر لە 100 كەس كراوە كە لە مانگی كانوونی یەكەمی ساڵی ڕابردووەوە لەلایەن هێزەكانی ئیسرائیلەوە لە سێ بەندیخانەی كاتیی سەربازیی ئەو وڵاتە ئازادكراون.

زانیاریی زیاتر: بە گوتەی دەستگیركراوەكان لە كاتی مانەوەیان لە بەندیخانە ڕووت كراونەتەوە، لێیان دراوە، سەگیان تێبەردراوە، خراونەتە ژێر گوشاری دەروونییەوە و دەستدرێژیی سێكسییان كراوەتە سەر. 

ئەوەی پێویستە بیزانیت: زانیارییەكانی ناو ڕاپۆرتەكەی ئونروا هاوشێوەی ئەوانەیە كە بەم دواییانە لەلایەن ڕێكخراوەكانی مافی مرۆڤی ئیسرائیلی و فەڵەستینی بڵاو كرانەوە.