پارێزگای نەینەوا ڕێوشوێنەکانی بەرەنگاربوونەوەی "نەخۆشیی ئاژەڵان" زیاتر دەکات

ئاڤا نیوز

دوای خۆپیشاندانی خاوەن ئاژەڵەکانی ناوچەی گۆگجەلی شاری مووسڵ، حکومەتی خۆجێی ئەو پارێزگایە ڕێوشوێنی زیاتر لە کێڵگە ئاژەڵییەکانی ئەو ناوچەیە دەگرێتەبەر.

چیرۆکی سەرەکی: شەوی شەممەی ڕابردوو، ژمارەیەك ئاژەڵداری گەڕەكی گۆگجەلی لە دەوروبەری شاری مووسڵ، ڕێگەی سەرەكی نێوان هەولێر-مووسڵیان داخستوو و ناڕازین لەوەی حكومەت شكستی هێناوە لە بەرەنگاربوونەوەی پەتای ئاژەڵی.

ڕاگەیێنراوی فەرمی: نووسینگەی پارێزگاری نەینەوا ڕایگەیاند: بەفەرمانی پارێزگاری نەینەوا، لیژنەی ڕاسپێردراو بە بەرەنگاربوونەوەی پەتای دەم و پەلەكانی ئاژەڵ و شاندی وەزارەتی کشتوکاڵ کۆبوونەوە، ڕێوشوێنە پێویستەکانی سنووردارکردنی بڵاوبوونەوەی ئەو نەخۆشیەیان تاوتوێ کرد، کە کاریگەری لەسەر کێڵگە ئاژەڵییەکانی ناوچەی کۆگجەلی هەبووە.

زانیاریی زیاتر: تیمە تایبەتمەندەکان دەستیان کردووە بە ڕشاندنی دەرمان لە کێڵگە زیانلێکەوتووەکان لە چوارچێوەی هەوڵەکان بۆ کۆنترۆڵکردنی پەتاکە و ڕێگریکردن لە بڵاوبوونەوەی.

ئەمەش بزانە: حكومەتی فیدڕاڵی بۆ ڕێگرتن لە تەشەنەسەندنی زیاتری پەتای دەم و پەلەكانی ئاژەڵ، ئابلۆقەی خستبووە سەر بەشێك لە كێڵگە ئاژەڵییەكان و ڕێگەنادات گۆشت و بەرهەمەكانی بفرۆشرێت، ئەمەش زیانێكی زۆری لە ئاژەڵداران داوە.