عێراق بڕیارێك لە دژی ئابووریی هەرێمی كوردستان دەدات

ئاڤا نیوز

حكومەتی عێراق بڕیارێكی تایبەت بە هاوردەكردنی كەلوپەل و خۆراك لە هەردوو دەروازەی ئیبراهیم خەلیل و حاجی ئۆمەرانەوە دەدات، بە جێبەجێكردنی ناوەڕۆكی بڕیارەكەش زیانی گەورە بەر ئابووری و بازرگانانی هەرێمی كوردستان دەگات.

چیرۆكی سەرەكی: حكومەتی عێراق بڕیارێكی لەدژی جموجۆڵی بازرگانیی هەرێمی كوردستان دەركردووە و بەپێی بڕیارەكە لەمەودوا هەر بازرگانێك لە ڕێگەی دەروازەكانی ئیبراهیم خەلیل و حاجی ئۆمەرانەوە، کاڵا و شتومەک هاوردە بکات، ناتوانێت لە کۆگاکانی هەرێمی کوردستان ڕایانبگرێت، بەڵکوو دەبێت دەستبەجێ هەناردەی پارێزگاکانی ناوەڕاست و خوارووی عێراقی بکات هاوكات دەبێت بارهەڵگرەکە كۆدی تایبەت بە وەزارەتی بازرگانیی عێراقی پێوەبێت، بەمەش دەبێت لەو دوو دەروازەیە جارێكی دیكە كەلوپەلەكان بگوازرێنەوە نێو بارهەڵگرێكی دیكەوە.

لێدوانی فەرمی: نەوزاد شێخ كامیل، بەڕێوەبەری گشتیی بازرگانیی هەرێمی كوردستان بە ئاڤا میدیای ڕاگەیاند: ئەمە بڕیارێكی سیاسییە و عێراق مەبەستی بچووككردنەوەی قەوارەی هەرێمی كوردستانە، بەتایبەت دەزانن كە گەشەسەندنێكی باش لە بوارەكانی كشتوكاڵ و بارزگانی و پیشەسازی و گەشتوگوزار لە هەرێمی كوردستان هەیە و حكومەتی عێراق  دەیەوێت  بەم بڕیارە دۆخی ژیانی هاووڵاتیانی هەرێمی كوردستان بشێوێنێت.

قووڵتر: بەرپرسانی وەزارەتی بازرگانیی هەرێمی كوردستان دەڵێن، حكومەتی عێراق لەو بڕیارەدا هیچ هەماهەنگییەكی لەگەڵ نەكردوون و ڕاستەوخۆ بڕیارەكەی داوە، هەر بۆیە هیچ زەمینەسازییەك نەكراوە، بەڵام بەپێی دەستوور دەبێت هەرێمی كوردستان لە هەموو ئەو بڕیارانەدا پرسی پێ بكرێت و بەشدار بێت، بیانووی حكومەتی عێراق بۆ ئەو بڕیارە و هاوشێوەكانی ئەوەیە مەركەزییەت بسەپێنێت ئەمە لەكاتێكدایە لە باشوور و ناوەڕاستی عێراق جێبەجێ ناكرێن.

زانیاریی زیاتر: بەپێی نووسراوەكەی وەزارەتی بازرگانیی عێراق، تاوەكو كۆتایی ئەم مانگە بوار لەبەردەم بازرگانانی هەرێمی كوردستانە و دواتر لە سەرەتای مانگی تازە دەبێت جێبەجێی بكەن، بەڵام لیژنەیەكی وەزارەتی بازرگانیی هەرێمی كوردستان سەرقاڵی گفتوگۆیە لەگەڵ بەرپرسانی حكومەتی عێراق بۆ ئەوەی پێداچوونەوە بە بڕیارەكەدا بكرێت و  بە لێكتێگەیشتن و ڕێككەوتن ناوەڕۆكی نووسراو و بڕیارەكە دابڕێژرێت.