بۆ هەڵگرتنی سزاکانی سەر سووریا ئەمریکا مەرجی هەیە

 

ئاڤا نیوز

ئەمریکا بۆ هەڵگرتنی سزاکان، لیستی مەرجەکانی ڕادەستی حکومەتی سووریا کردووە و دەیەوێت دیمەشق جێبەجێی بکات لە بەرامبەر کەمکردنەوەی بەشێک لە سزاکانی سەر ئەو وڵاتە.

وێنە گەورەکە: بە مەبەستی بوژانەوەی ئابووری وڵاتەکەی، سووریا پێویستی بەوەیە ئەمریکا و وڵاتانی ڕۆژئاوا سزاکانی لەسەر هەڵبگرن، کە پێشتر بەهۆی سیاسەتەکانی بەشار ئەسەد بەسەر ئەو وڵاتەدا سەپێنرابوون.

لێدوانی فەرمی: چەند سەرچاوەیەکی ئەمریکا و سووریا ئەوەیان بۆ ئاژانسی ڕۆیتەرز ئاشکراکردووە، ناتاشا فرانسیسکی، جێگری یاریدەدەری وەزیری دەرەوەی ئەمریکا بۆ شام و سوریا لیستی داواکارییەکانی بە ئەسعەد شەیبانی، وەزیری دەرەوەی سووریا داوە، ئەمەش یەکەم کۆبوونەوەی باڵای نێوان ئەمریکا و سووریا بووە دوای دەستبەکاربوونی دۆناڵد ترەمپ.

زانیاریی زیاتر: لەنێو ئەو مەرجانەی ئەمریکا دایناون، لەناوبردنی هەر کۆگایەکی چەکی کیمیایی کە مابێتەوە لەلایەن سووریا و ئەو وڵاتە هاوکاری ئەمریکا بکات لە بەرەنگاربوونەوەی تیرۆر، هاوکات داواکارییەکی دیکەی ئەمریکا لە سووریا دڵنیابوون بووە لەوەی چەکدارانی بیانی لە حکومەتی سووریا پۆستی باڵایان پێنەدرێت.

هەروەها واشنتۆن داوای لە سووریا کردووە هاوکاری هەوڵەکانی ئەمریکا بۆ دۆزینەوەی ئۆستین تایس، ئەو ڕۆژنامەنووسە ئەمریکییە بکات کە زیاتر لە دە ساڵ لەمەوبەر لە سووریا بێسەروشوێن بووە.