بەهۆی تەقینەوەی مین گەنجێکی قەزای سیدەکان گیانی لەدەستدا

ئاڤا نیوز

 

ئەم بەیانییە مین بە گەنجێکی قەزای سیدەکان تەقیەوە و بەهۆیەوە گیانی لەدەستدا، دەزگای مین دەڵێت، بۆ گژوگیای بەهارە لەو ناوچەیە بووە.

 

وێنە گەورەکە: ساڵانە لە وەرزی بەهار، خەڵکێکی زۆر بۆ کردنی گژوگیای بەهارە ڕوو لە ناوچە شاخاویی و چیاییەکان دەکەن، بەو هۆیەوە ڕووداوەکانی پێدا تەقینەوەی مین زیاد دەکەن. 

 

لێدوانی فەرمی: عەلی میران، بەڕێوەبەری گشتی تەکنیکی ئەندازەیی لە دەزگای مین بە ئاڤا میدیای ڕاگەیاند، ئەو گەنجە دانیشتووی گوندی قەلیتانی سەر بە ناحیەی سیدەکانە، لە چیای قەلەڕەشی دەڤەری برادۆست مین پێیدا تەقیوەتەوە و گیانی لەدەستداوە. ئەو گەنجە بۆ کردنی گژوگیای بەهارە لەو ناوچەیە بووە.

 

زانیاریی زیاتر: بەگوێرەی ئەو زانیارییانەی بە ئاڤا میدیا دراون، گەنجەکە خێزاندارە و خاوەنی دوو منداڵە و تەمەنی 35 ساڵە، هاوکات باوکی ئەو گەنجە 11 ساڵ لەمەوبەر بەهەمان ڕووداوی پێدا تەقینەوەی مین گیانی لەدەستداوە.

باکگراوند: بەگوێرەی ئاماری دەزگای مین لە سێ مانگی ئەمساڵ بەهۆی تەقینەوەی مین، سێ کەس گیانیان لەدەستداوە دووانیان لە سنووری پارێزگای هەولێر و یەکێکیان لە پارێزگای سلێمانی بووە، جگە لەوە سێ کەسیش بریندار بوون.