تورکیا: ئیسرائیل گەورەترین هەڕەشەیە بۆ سەر ڕۆژهەڵاتی ناوڕاست

ئاڤا نیوز

تورکیا وەڵامی لێدوانەکانی وەزیری بەرگری ئیسرائیل دەداتەوە و وڵاتەکەی بە هۆکاری ناسەقامگیری ڕۆژهەڵاتی ناوڕاست تۆمەتبار دەکات.

چیرۆکی سەرەکی: دوای ئەوەی ئیسرائیل کاتز، وەزیری بەرگری ئیسرائیل، ئەنقەرەی بە دەستوەردان و تێکدانی ئاسایشی سووریا تۆمەتبار کرد و هەڕەشەی تووندی کرد لە هێزەکانی پشتیوانلێکراو لە لایەن تورکیاوە و ڕایگەیاند، مەترسی دروستکردن بۆ سەر ئاسایشی ئیسرائیل باجەکەی قورس دەبێت، لە وەڵامدا وەزارەتی دەرەوەی تورکیا وەڵامی ئیسرائیلی دایەوە و حکومەتی ئیسرائیل بە شەڕانگێز و ڕەگەزپەرست ناوزەند دەکات.

بڵاوکراوەی فەرمی: وەزارەتی دەرەوەی تورکیا لە بڵاوکراوەیەکی فەرمیدا حکومەتی ئیسرائیل بە بەردەوامیدان بە سیاسەتی فراوانخوازی داگیرکارییانە تۆمەتبار دەکات ڕایگەیاند: " ئیسرائیل نیگەرانە لە ڕۆڵی ئەرێنیانەی تورکیا لە پێناو بەرپابوونی ئاسایش و سەقامگیری لە ناوچەکە و سەرەڕای بوونی ڕێککەوتنی ئاشتی و ئاگربەست، بەردەوامە لە هێرشەکانی بۆ سەر لوبنان و دەیەوێت ئاسایشی سووریا بشێوێنێت."

زانیاریی زیاتر: وەزارەتی دەرەوەی تورکیا ئیسرائیل بە شەڕانگێز و پشتیوان لە تیرۆر تۆمەتبار دەکات و بە گەورەترین هەڕەشە بۆ سەر سەقامگیری ڕۆژهەڵاتی ناوڕاست ناوزەندی دەکات، کشانەوەی هێزەکانی ئیسرائیل لە خاکی سووریا بە ڕێگەچارەی کۆتایهێنان بە کێشە و ناکۆکیەکان دادەنێت.