ئێران: ئێمە جەنگ دەستپێناکەین بەڵام بۆ جەنگ ئامادەین

ئاڤا نیوز

فەرماندەی سوپای پاسدارانی ئێران پەیامێک ئاراستەی ئەمریکا دەکات و ئامادەیی سوپای پاسداران بۆ جەنگ ڕادەگەیەنێت.

وێنە گەورەکە: گرژی و ناکۆکیەکانی نێوان تاران و واشنتن لە سەر بەرنامە ئەتۆمیەکەی ئێران گەشتۆتە ئاستی هەڕەشەکردن بۆ دەستپێکردنی جەنگ و دۆناڵد ترەمپ، سەرۆکی ئەمریکا چەندین جار هەڕەشەی هێرشکردنە سەر ئێرانی کرد گەر ئامادەی گفتوگۆکردن نەبن لە سەر بەرنامەی ئەتۆمی.

لێدوانی فەرمی: حوسێن سەلامی، فەرماندەی سوپای پاسدارانی ئێران ڕایگەیاند:

٠ هیچ ترسێکمان نیە لە جەنگ، فێربووین چۆن بە سەر دوژمندا سەربکەوین و بە هیچ شێوەیەک لە بەرامبەر دوژمن ناکشێینەوە.

٠ لە ترۆپکی هێز و توانای سەربازیداین، هیچ هێرشێکی سەربازی بۆ سەر خاکی ئێران بێ وەڵام نابێت.

٠ ئێمە دەستپێشخەر نابین بۆ دەستپێکردنی جەنگ بەڵام ئامادەین بۆ جەنگ.

لە لایەکی دیکەوە: ئەمڕۆ بۆ جارێکی دیکە ڕووسیا ئامادەیی وڵاتەکەی دەربڕی بۆ نێوەندگیری لە نێوان ئەمریکا و ئێران، لە پێناو ئاساییکردنەوەی پەیوەندییەکان و ڕێگریکردن لە هەڵگیرسانی جەنگ، داوای کۆبوونەوەی ڕاستەوخۆی سێلایەنەی مۆسکۆ و تاران و واشنتنی کرد.