قۆناغی یەكەمی نۆژەنكردنەوەی شوێنەوارێكی گرنگی دهۆک تەواو دەبێت

ئاڤا نیوز

قۆناغی یەکەمی پرۆژەی نۆژەنکردنەوەی شوێنەوارێکی گرنگی دهۆک کە مێژووەکەی بۆ هەزاران ساڵ دەگەڕێتەوە، تەواو دەبێت و لە ئاییندەیەکی نزیدا دەست بە قۆناغی دووەمی نۆژەنکردنەوەکە دەکرێت.

 

چیرۆکی سەرەکی: ماوەی دوو ساڵە پرۆژەی نۆژەنکردنەوەی ئەشکەوتی چوارستوون 'چارستین' بەردەوامە و تەواوکردنی قۆناغی یەکەمی پرۆسەکە نزیکەی ملیۆنێک دۆلاری تێچووە کە ئەو بڕە پارەیە بەهاوبەشی لەنێوان حکومەتی هەرێمی کوردستان و یەکێتیی ئەوروپا و یونسکۆ و ڕێکخراوی ILO تەرخانکراوە، لە ئاییندەیەکی نزیکیشدا دەست بەقۆناغی دووەمی نۆژەنکردنەوە دەکرێت.

 

بۆچی گرنگە: پرۆژەکە جگە لە بوژاندنەوەی سێکتەری شوێنەواریی هەرێمی کوردستان و پارێزگای دهۆک بەتایبەت، ڕێگەی نوێی بۆ دروست دەکرێت و ڕووناکی و ئاو و زیادکردنی سەوزایی و کامێرای بۆ دادەنرێت، بەمەش دەبێتە ڕووگەیەکی گرنگی گەشتیاری لە پارێزگاکە.

 

ئەوەی پێویستە بیزانیت: ئەشکەوتی چوارستوون دەکەوێتە گەلی دهۆک و خوار بەنداوی دهۆک، پانتاییەکەی 6 هەزار مەتر چوارگۆشەیە، مێژووەکەی بۆ سەدان ساڵ پێش زایین دەگەڕێتەوە، شوێنێکی پیرۆز بووە بۆ زەردەشتییەکان، ناوەکەی لە چوار توخمی سەرەکی و پیرۆزی ئایینی زەردەشتییەوە هاتووە کە بریتین لە: ئاگر، خاک، ئاو و هەوا؛ لە سەردەمێکیشیدا جێگەی کۆبوونەوەی زەردەشتییەکان بووە و تێیدا سرووتە ئایینییەکان جێبەجێ کراون و "شەرابی پیرۆز"ـیان تێدا بەرهەم هێناوە.