لیژنەی تەندروستی هەڵەبجە هەڵمەتێک بۆ ڕێکخستنەوەی دەرمانخانەکان دەست پێدەکات

ئاڤا نیوز

لیژنەی تەندروستی هەڵەبجە هەڵمەتێکی فراوانی بۆ دەرمانخانەکانی ناوەندی قەزای هەڵەبجە دەستپێکرد، بە ئامانجی پاراستنی گیانی هاوڵاتیان و ڕێکخستنەوەی کاری دەرمانخانەکان.

ئەوەی پێویستە بیزانیت: لیژنەکە کە پێکهاتبوو لە نوێنەرانی ئاسایش، سەندیکای دەرمانسازان، تاقیگەکان، هۆبەی دەرمان و بەشی ڕاگەیاندن، لە قۆناغی یەکەمدا لە کۆی 18 دەرمانخانەی شارەکە، سەردانی 11 دەرمانخانەیان کرد.

لێدوانی فەرمی: د. سنور حامید، یاریدەدەری بەڕێوەبەری گشتیی تەندروستی هەڵەبجە بۆ ئاڤامیدیا ڕایگەیاند: لەو دەرمانخانانەی ئەمڕۆ سەردانمان کردن، تەنها دووانیان پابەندی ڕێنماییەکان بوون.

- زۆربەی سەرپێچییەکان پەیوەندییان بە مۆڵەتەکانەوە هەیە، بەتایبەت ئەو دکتۆرانەی کە مۆڵەتەکان بەناوی ئەوانەوە دەرچووە، بەڵام خۆیان پابەندی دەوامکردن نین، ئەمەش وادەکات ئەو کارمەندانەی لەوێ کار دەکەن پسپۆڕییان لە دەرمانسازیدا نەبێت و زۆرجار کێشە بۆ چارەخواز دروستدەکات.

- مۆڵەت لەو دەرمانخانانە وەرگیراوەتەوە و ماوەی 10 ڕۆژیان پێدراوە بۆ چارەسەرکردنی کەموکوڕییەکانیان، بەپێچەوانەوە دەرمانخانەکانیان دادەخرێت.