بانگهێشتکردنی ئەحمەد شەرع بۆ بەغدا کاردانەوەی لێدەکەوێتەوە

 

ئاڤا نیوز

لێدوانەکەی سوودانی لە سلێمانی بۆ بانگهێشتکردنی سەرۆکی سووریا بۆ بەغدا و بەشداریکردنی لە لوتکەی عەرەبی کاردانەوەی لە عێراق لێدەکەوێتەوە.

چیرۆکی سەرەکی: لە یەکەم ڕۆژی دیداری سلێمانی کە سەرۆکوەزیرانی عێراق یەکێک بوو لە میوانە سەرەکییەکانی دیدارەکە، بەشداری لە پانێڵێکدا کرد و ڕایگەیاند، نامەی بانگهێشتکردنی فەرمیمان بۆ سەرۆککۆماری سووریا ناردووە بۆ بەشداریکردن لە لوتکەی وڵاتانی عەرەبی لە بەغدا.

زانیاریی زیاتر: ئەحمەد شەرع، سەرۆککۆماری سووریا کە لای عێراقییەکان بە ئەبو محەممەد جۆلانی ناسراوە، پێشتر لەلایەن دەسەڵاتی دادوەریی عێراقەوە فەرمانی دەستگیرکردنی هەبووە، بەو پێیەی دەستی بە خوێنی عێراقییەکان سوورە.

لێدوانی فەرمی: محەممەد شیاع سوودانی، سەرۆکوەزیرانی عێراق لە دیداری سلێمانی ڕایگەیاند: بە فەڕمی نامەی بانگهێشتکردنم بۆ ئەحمەد شەرع ناردووە و ئامادەم لە بەغدا پێشوازی لێبکەم.

کاردانەوەکان: ئەو لێدوانەی سوودانی هەر زوو کاردانەوەی لایەنە سیاسییەکانی لەسەر ئاستی کەسی بەدوای خۆیدا هێنا، چونکە ئەحمەد شەرع پێشتر لەلایەن دەسەڵاتی دادوەریی عێراقەوە فەرمانی دەستگیرکردنی هەبووە.

٠ عەباس موسەوی، ڕاوێژکاری هاوپەیمانی دەوڵەتی یاسا ڕایگەیاند: بانگهێشتکردنی شەرع بۆ بەشداریکردن لە لوتکەی عەرەبی دوو لایەنی هەیە، یەکەمیان بەرپرسیارێتی حکومەتە لەسەر داوای کۆمکاری عەرەبی، لایەنی دووەمیش ڕەتکردنەوەی جەماوەرییە.

٠ عادل مانع، توێژەری کاروباری سیاسی ئاماژە بۆ ئەوە دەکات، بانگهێشتی شەرع بۆ بەغدا بەهۆی بەشداریکردنی لە کردەوە تیرۆریستییەکان له عێراق، ڕەتکراوەتەوە و دەڵێت: دەسەڵاتی دادوەری عێراق بڕیار لەسەر تاوانەکانی شەرع بەرامبەر عێراقییەکان دەدات، بەو پێیەی ئەم بابەتە دەکەوێتە چوارچێوەی دەسەڵاتی ئەو.

لە لایەکی دیکەوە: سەرەڕای ناڕەزایەتییەکان، بەڵام سووریا و عێراق خوازیاری بەهێزکردنی پەیوەندییەکانیانن، هەر لەدوای ڕووخانی دەسەڵاتەکەی ئەسەد شاندێکی عێراق بە سەرۆکایەتیی حەمید شەتری، سەرۆکی دەزگای هەواڵگریی عێراق سەردانی دیمەشقی کردو لەگەڵ ئەحمەد شەرع کۆبووەوە.

ئەوەی پێویستە بیزانیت: بڕیارە لە 17ـی ئایار، لوتکەی وڵاتانی عەرەبی لە شاری بەغدا بەڕێوەبچێت.