لە کەرکووک کارمەندێکی تەندروستی دووچاری "تای خوێنبەربوون" بوو

ئاڤا نیوز

 

ژمارەی ئەوانەی دووچاری تای خوێنبەربوون هاتوون بەرز دەبێتەوە، وەزارەتی تەندروستی عێراق ڕایگەیاندووە، ژمارەی تووشبووان بۆ 26 حاڵەت بەرز بووەتەوە. لەناو تووشبووان کارمەندێکی تەندروستی کەرکووک هەیە.

 

وێنە گەورەکە: تای خوێنبەربوون نەخۆشییەکی ڤایرۆسییە و لە ئاژەڵەوە بۆ مرۆڤ دەگوازرێتەوە، تا ئێستا چەند جۆرێکی دەستنیشان کراون، ئەو کەسەی تووشی دەبێت لەماوەی دوو بۆ سێ هەفتە بە تەواوی نیشانەکانی لێ دەردەکەوێت.

 

لێدوانی فەرمی: سامان یابە، بەڕێوەبەری ڕاگەیاندنی تەندروستی کەرکووک بە ئاڤا میدیای ڕاگەیاند، لەماوەی ڕابردوودا نمونەی خوێنی 33 نەخۆشمان بۆ پشکنین ناردە بەغدا، دەرکەوت لەو ژمارەیە پێنج کەسیان هەڵگری تای خوێنبەربوونن، سێیانیان گیانیان لەدەستدا، یەکێکی دیکەیان چاک بوویەوە و نەخۆشخانەی جێهشت.

 

بەڕێوەبەری ڕاگەیاندنی تەندروستی کەرکووک ئەوەش دەڵێت: تەنیا یەک نەخۆش لەژێر چاودێری لە نەخۆشخانە ماوە، ئەویش کارمەندێکی ئافرەتی تاقیگەی نەخۆشخانەیە و تەمەنی 37 ساڵە. لە ئەنجامی وەرگرتنی خوێنی نەخۆش دووچاری ڤایرۆسەکە بووە، بەڵام ئێستا تەندروستی جێگیرە.

 

هۆکارە زانراوەکان: گواستنەوەی ڤایرۆسی تای خوێبەربوون دەکرێت لەڕێگای خوێن یان لیک یان هەر جۆرە ماددەیەکی شلەمەنی جەستەی ئاژەڵ بێت کە دواتر لەڕێگای مێش و زیندەوەرە بچووکەکان بۆ مرۆڤ دەگوازرێتەوە. نیشانەکانی لە کەسێک بۆ کەسێکی دیکە دەگۆڕێت، بەڵام بە گشتی تا، سکچوون و ڕشانەوە نیشانە باوەکانن.