سەرۆکوەزیران بارزانی: لەژێر هیچ فشارێکدا دەستبەرداری مافەکانمان نابین

ئاڤا نیوز

 

سەرۆکوەزیران بارزانی لەگەڵ ستیڤن هیچن، باڵیۆزی بەریتانیا لە عێراق کۆبووەوە و هەردوولا لەسەر پاراستنی ئاسایشی ناوچەکە هاوڕابوون.

ڕاگەیێنراوی فەرمی: "گفتوگۆ لەبارەی پەرەپێدانی پەیوەندیی دوولایەنە، دۆخی گشتی و دوایین پەرەسەندن و پێشهاتەکانی عێراق و ناوچەکە، هەروەها گرنگیی چارەسەرکردنی کێشەکانی هەرێمی کوردستان و حکومەتی عێراق لەسەر بنەمای دەستوور و ڕێککەوتنەکان کرا".

لەلایەکی دیکەوە: باڵیۆزی بەریتانیا جەختی لەوە کردەوە کە هاوبەشییان لەگەڵ هەرێمی کوردستان جێی بایەخی ئەوانە لە هەماهەنگیی هەمەلایەنە لەگەڵ حکومەتی هەرێمی کوردستان بەردەوام دەبن. 

قووڵتر: لەو کۆبوونەوەیەدا سەرۆکوەزیران بارزانی دووپاتی کردەوە کە هەرێمی کوردستان داکۆکی لە مافە دەستوورییەکانی دەکات و لەژێر هیچ فشارێکیشدا، دەستبەرداری مافەکانی نابێت. 

زانیاریی زیاتر: پشتیوانیکردنی چاکسازییەکانی وەزارەتی پێشمەرگە و گرنگیی پاراستنی مافەکانی پێکهاتەکانی کوردستان و پێویستیی پێکهێنانی ئەنجومەنی فیدراڵی، چەند تەوەرێکی دیکەی گفتوگۆکانی کۆبوونەوەکە بوون.