ئێران بڕیارێکی ئەمریکا بە "شکستپێهێنەری دانوستاندنەکان" ناوزەند دەکات

ئاڤا نیوز

 

وەزیری دەرەوەی ئێران ڕەخنە لە دوایین بڕیاری ئەمریکا دەگرێت بۆ سزادانی تۆڕێکی بازرگانیی ئێرانی و چینی و بە "شکستپێهێنەری دانوستاندنەکان" ناوزەندی دەکات.

 

وێنە گەورەکە: بە تۆمەتی کڕینی سوتەمەنی موشەکی بالیستیک بۆ سوپای پاسدارانی ئێران، لە نوێترین بڕیاردا وەزارەتی گەنجینەی ئەمریکا سزای تۆڕێکی بازرگانی دەدات کە لە شەش کۆمپانیا پێک دێن و بارەگای سەرەکیان لە ئێران و چین هەیە. بە پێی بڕیارەکە وەزارەتی گەنجینەی ئەمریکا ئەو کۆمپانیایانە تۆمەتبار دەکات بە کڕین و گواستنەوەی پێداویستی کیمیاوی و سوتەمەنیی موشەکی بالیستیک بۆ سوپای پاسدارانی ئێران.

 

لێدوانی فەرمی: عەباس عێراقچی، وەزیری دەرەوەی ئێران لە تاران بە ڕۆژنامەنوسانی ڕاگەیاند، بڕیارەکانی ئەمریکا زیانی گەورە بە دانوستاندنەکان دەگەیێنێت و بەردەوامی ئەم سیاسەتی سزادانە، دەبێتە هۆی شکستپێهێنانی هەوڵەکانی گەشتن بە ڕێککەوتن، ئەم بڕیارانە پیشاندانی بەپەرۆشنەبوونی ئەمریکایە سەبارەت بە دانوستاندنەکان و پێویستە دەستبەرداری سیاسەتی سزادان ببن.

 

زانیاریی زیاتر: عەباس عێراقچی، وەزیری دەرەوەی ئێران سەبارەت بە کۆبوونەوەی داهاتووی وەفدی ئەمریکا و ئێران گوتی: "سەرەڕای بڕیارەکانی ئەمریکا بەڵام کۆبوونەوە و دانوستاندنەکان بەردەوام دەبێت، ئێمە بۆیە دانوستاندن دەکەین چونکە ناکۆکیمان هەیە و دەبێت چارەسەر بۆ کێشە و ناکۆکیەکانی نێوانمان بدۆزینەوە."