گرژییەکانی پارێزگای ڕیفی دیمەشق کوژرانی 56 کەسی لێدەکەوێتەوە

ئاڤا نیوز

 

گرژییەکان لە پارێزگای ریفی دیمەشق سووریا بەردەوامن و ژمارەی کوژراوانیش لەنێوان هێزەکانی حکومەت و ئەندامانی پێکهاتەی دروزەکان بۆ 56 کەس بەرزبووەوە.

 

وێنە گەورەکە: لە ڕۆژی سێشەممەی ڕابردووەوە لە شارەکانی جەرمانا و ئەشرەفییە سحنایا لە پارێزگای ریفی دیمەشق شەڕ و ڕووبەڕووبوونەوە لە نێوان گرووپە چەکدارەکانی دروز و هێزەکانی حکومەت بەردەوامە، دوێنێش ئیسرائیل بۆ پشتیوانی دروزەکان چەندجارێک هێزەکانی سووریای لەو دوو شارە کردە ئامانج.

 

ڕاگەیێنراوی فەرمی: ڕوانگەی سووری بۆ مافەکانی مرۆڤ ئەمڕۆ پێنجشەممە بڵاویکردەوە، لە تازەترین پێشهاتدا و لەسەر ڕێگەی دیمەشق-سویدا نۆ ئەندامی دروزەکان کەوتوونەتە کەمینی هێزەکانی حکومەتەوە و سەرجەمیان لەسێدارە دراون، بەوەش تائێستا 15 ئەندامی دروزەکان لەو ڕێگایەدا کوژراون.

 

ژمارەکان وادەڵێن: لە ڕووبەڕووبوونەوەکانی سێ ڕۆژی ڕابردوو 15 چەکداری دیکەی دروزەکان و 26 سەرباز و ئەندامی هێزەکانی حکومەتی سووریا کوژراون.