یەکەم تووشبووی تای خوێنبەربوون لە هەرێمی کوردستان تۆمار کرا

ئاڤا نیوز

یەکەم تووشبوون بە نەخۆشی تای خوێنبەربوون لە هەرێمی کوردستان تۆمارکرا كە دانیشتووی شاری كۆیەیە و پیشەی گۆشتفرۆشە.

 

لێدوانی فەرمی: د. سەرکار سورچی، وتەبێژی وەزارەتی تەندروستی ڕایگەیاند، ئەمڕۆ هەینی، یەكەم حاڵەتی تووشبوون بە نەخۆشی تای خوێنبەربوون لە هەرێمی كوردستان تۆماركرا كە هاونیشتمانییەکی كۆیە'یە و تەمەنی 42 ساڵە و پیشەی گۆشتفرۆشە.

- وتەبێژی وەزارەتی تەندروستی ڕاشیگەیاند، نەخۆشەكە ئێستا لە نەخۆشخانەیەكی شاری هەولێر چارەسەری پزیشكیی وەردەگرێت و دۆخی تەندروستی جێگیرە.

 

زانیاریی زیاتر: بە گوێرەی نوێترین ئاماری وەزارەتی تەندروستی عێراق، ژمارەی تووشبووان بە تای خوێنبەربوون گەیشتووەتە 29 حاڵەت، پێنج تووشبووش گیانیان لەدەستداوە.

 

ئەوەی پێویستە بیزانیت: وەزارەتی تەندروستیی هەرێمی كوردستان، داوا لە هاونیشتمانیان دەكات پابەندی جێبەجێکردنی ڕێنماییەکانی وەزارەتی تەندروستی بن، و لەکاتی هەبوونی نیشانەکانی نەخۆشی لەسەر ئاژەڵ، پێویستە تیمەکانی ڤێترنەری ئاگاداربکەنەوە. هەروەها هاووڵاتیانی بەرکەوتووانی بەخێوکردنی ئاژەڵ یان بەرهەمەکانی ئاژەڵ، لەکاتی بەدیكردنی هەر نیشانەیەکی ناتەندروست، سەردانی نەخۆشخانەکان بکەن.

 

باكگراوند: تای خوێنبەربوون نەخۆشییەکی ڤایرۆسییە و لە ئاژەڵەوە بۆ مرۆڤ دەگوازرێتەوە، نیشانەکانی نەخۆشییەکە بریتین لە بەرزبوونەوەی پلەی گەرمیی جەستە، سەرئێشە و خوێنبەربوونی ژێر پێست، بە نەخۆشییەكی كوشندە هەژماردەكرێت و تا ئێستا چەندین کەسیش بەو نەخۆشییە گیانیان لەدەستداوە.