ئاسایشی عێراق: کەسێکی مەترسیدارمان لە کەرکووک دەستگیرکرد

ئاڤا نیوز

دەزگای ئاسایشی نیشتمانیی عێراق ڕایدەگەیێنێت لە کەرکووک کەسێکی مەترسیداریان دەستگیرکردووە کە لەڕێگەی تۆڕە کۆمەڵایەتییەکانەوە  هەڕەشەی لە هاووڵاتیانی شارەکە کردووە.

ڕاگەیێنراوی فەرمی: بەگوێرەی ڕاگەیێنراوی دەزگای ئاسایشی نیشتمانیی عێراق پاڵپشت بە زانیاری ورد هێزەکانمان توانیویان یەکێک لە مەترسدارترین ئەو کەسانە لەشاری کەرکووک دەستگیر بکات کە جێگەی مەترسی بوو بۆ هاووڵاتیانی شارەکە کە لە ڕێگەی پلاتفۆڕمە جیاوازەکانی سوشیاڵ میدیاوە هەڕەشەی لە خەڵک کردووە.

لەلایەکی دیکەوە: هەر بەگوێرەی دەزگای ئاسایش لە لێکۆڵینەوە سەرەتاییەکاندا دەرکەوتووە تۆمەتبارەکە لەڕێگەی پەیجەکانییەوە سەرجەم چین و توێژە جیاوازەکانی کۆمەڵگەی عێراقی کردووەتە ئامانج، هەر لە هاووڵاتییەکی ئاساییەوە تاوەکو دەگاتە فەرمانبەری حکومەت، دادگای تێهەڵچوونەوەی کەرکووک، چەندین سەرکردەی ئەمنی، ئەندامی پەرلەمان، ئەکادیمی و پزیشکی بە هەردوو ڕەگەزی نێر و مێ.

لەهەمان کاتدا: دەزگای ئاسایشی نیشتمانیی عێراق داوا لەسەرجەم هاووڵاتیان دەکات ئەوانەی ڕووبەڕووی هەڕەشە بوونەوەتەوە لە ڕێگەی پەیجەکانی بەناو (ئەهل کەرکووک) و (هونا کەرکووک)، سکاڵای فەرمی پێشکەش بە لایەنە دادوەرییە تایبەتمەندەکان بکەن، بۆ گرتنەبەری ڕێکارە یاساییە پێویستەکان بەرامبەر بەو کەسە.