عێراق 50 هەزار تۆن گەنم بە دیاریی دەداتە توونس

ئاڤا نیوز

حکومەتی عێراق بڕیاریدا 50 هەزار تۆن گەنم وەک هاوکاریی لە گەلی عێراقەوە بە دیاریی ببەخشێتە گەلی توونس.

بۆچی گرنگە: توونس ڕووبەڕووی سێ ساڵ وشکەساڵی بووتەوە، لە ساڵی 2024دا، گەنمی هاوردەکراو 81.8% پێداویستییەکانی توونسی دابینکردووە، چونکە ساڵی ڕابردوو بەرهەمهێنانی گەنمی توونس تەنها 750 هەزار تۆن بووە، بۆ ئەمساڵیش دەبێت  95%ی پێداویستییەکانی گەنم لە دەرەوە هاوردە بکات.

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق لە کۆبوونەوەی ئەمڕۆی ئەنجوومەنی وەزیراندا، لە چوارچێوەی پشتیوانی عێراق بۆ وڵاتانی عەرەبی، بڕیاری دا بە بەخشینی 50 هەزار تۆن گەنم بە کۆماری توونس، وەک دیاری لە گەلی عێراقەوە بۆ گەلی توونس.

ئەوەی پێویستە بیزانیت: هەر لەمساڵدا عێراق بڕیاریدا بڕی 220 هەزار تۆن گەنم وەک هاوکاری ڕەوانەی سووریا بکات، یەکەمین کاروانی ئەو دەسپێشخەرییەش لەڕێگەی دەروازەی ئەلبوکەمالەوە لە 26ـی نیسان گەیشتە دێرەزوور.