لە هەولێر گەورەترین نافوورە و گۆڕەپانی شانۆی ڕۆمانی لەسەر ئاستى عێراق دروست دەکرێت

ئاڤا نیوز

پڕۆژەی دروستکردنی پارکی ڕەشکین لە 10%ـی کارەکانی  تەواوبووە، لەنێو پڕۆژەکەدا گەورەترین نافوورە لەسەر ئاستی عێراق دروست دەکرێت و شانۆیەکی ڕۆمانیش لە پارکەکەدا دروست دەکرێت کە شوێنی پێنج هەزار کەسی تێدا دەبێتەوە.

چیرۆکی سەرەکی: بە گوژمەی 15 ملیار دینار، لەسەر ڕووبەری نزیکەی 120 هەزار مەتر دووجا، لەسەر شەقامی 120 مەتری و جووتسایدی ڕەشکین، پارکی ڕەشکین لە شاری هەولێر دروست دەکرێت، كە دەبێتە یەکێک لە گەورەترین و سەرنجڕاکێشترین پارکە سەوزەکان لەسەر ئاستى هەرێمی کوردستان و عێراق.

لێدوانی فەرمی: ئەندازیار هیوا سلێمان، سەرپەرشتیاری پڕۆژەی پارکی ڕەشکین بە ئاڤای ڕاگەیاند، "لەنێو پارکی ڕەشکین گەورەترین نافوورەی مۆسیقی لەسەر ڕووبەری شەش هەزار و 500 مەتر دروست دەکرێت، بەرزی حەوزی نافورەکە 70 سانتیمتەرە و سێ هەزار و 600 مەتر چوارگۆشە ئاو لەخۆدەگرێت، ئاوی نافورەکە لەگەڵ میوزیکدا بەرز دەبێتەوە و تاوەکو بەرزی 25 مەتر دەڕوات، تێچووی دروستکردنەکەی سێ ملیار دینارە و لەسەر ئاستی عێراق گەورەترینە."

زانیاریی زیاتر: "لە بەشێکی دیکەی پارکەکەدا گۆڕەپانێکی هاوشێوەی شانۆی ڕۆمانی بە شێوەی بازنەیی لەسەر ڕووبەری 8 هەزار مەتر چوارگۆشە دروست دەکرێت، لە شانۆکەدا شوێنی دانیشتن شەش پایەیە و 120 مەتر درێژە، پێنج هەزار شوێنی دانیشتنی تێدایە، تێچووی دروستکردنەکەشی نزیکەی یەک ملیار دینار دەبێت.

ئەمەش بزانە: پاركەكە لە ڕووی دیزاین و شێوازی دروستکردنەوە جیاواز و مۆدێرنە تەواوی کەلوپەل، گوڵ و دار و درەختەکانی ئەم پارکە لە وڵاتانی ئیسپانیا و ئیتاڵیا هێنراون، ماوەى تەواوکردنى پڕۆژەکە 18 مانگە، زیاتر لە 80 کرێکار و ئەندازیار ڕۆژانە لە پڕۆژەکەدا کار دەکەن.