لە شەرگات دەست بەسەر ژمارەیەک چەک و تەقەمەنیدا دەگیرێت

ئاڤا نیوز

لە ئۆپەراسیۆنێکی سەربازیدا لە پارێزگای سەڵاحەدین، دەست بەسەر ژمارەیەک چەک و تەقەمەنیدا دەگیرێت و حەشارگەیەکی تیرۆرستانیش ئاشکرا دەکرێت.

وێنە گەورەکە: بۆ ڕێگریکردن لەسەرهەڵدانەوەی تیرۆر و شانەنووستووەکانی داعش، دەزگای ئاساییش و هەواڵگری عێراق و هێزەکانی پێشمەرگە بەردەوام لە چاودێریکردنی جموجۆڵەکانی ئەو شانانەن و هەندێکجاریش ئۆپەراسیۆنی سەربازی لەو شوێنانەی پێویستە ئەنجام دەدەن.

زانیاریی بەدەستهاتوو: بەیانیی ئەمڕۆ هەینی 9-5-2025 هێزێکی هاوبەشی دەزگای ئاساییش هەواڵگریی عێراق لە چەند میحوەرێکی ناوچەی قەریعەت نەملی سەر بە ناحییەی شەرگات لە پارێزگای سەڵاحەدین، ئۆپەراسیۆنێکی سەربازی ئەنجامدا بەمەبەستی پاککردنەوەی ئەو ناوچەیە لە شانە نوستووەکانی داعش، لەئەنجامدا دەست بەسەر ژمارەیەک چەک و تەقەمەنی گیرا و حەشارگەیەکی شانە نوستووەکانی داعشیش ئاشکراکرا.

زانیاریی زیاتر: بەپێی سەرچاوەیەکی ئەمنی هەڵمەتەکە بەمەبەستی ڕاماڵین و پاککردنەوەی ناوچەکە لە پاشماوەکانی تیرۆریستان و دابینکردنی ئاسایش و سەقامگیریی زیاتر بۆ دانیشتوانی ناوچەکە و نەهێشتنی مەترسی و ڕێگریی لە چالاکی و جموجۆڵی تیرۆریستان تاوەکو کاتێکی نادیار بەردەوام دەبێت.