کەمپەینی کۆکردنەوەی هاوکاری بۆ شاعیرێکی ڕۆژهەڵاتی کوردستان دەکرێت

ئاڤا نیوز

بەشێک لە کوردانی دانیشتووی کەنەدا، کەمپەینێکی کۆکردنەوەی هاوکارییان بۆ شاعیر نادری قازی ناسراو بە (خاڵە قازی) دەستپێکردووە، ئەو بە شیعری "دوو دانە دوو دەکاتە یەک، نابێتە چوار" ناودەنگی هەیە، بەڵام ئێستا دووچاری نەخۆشیەکی قورس هاتووە و پێویستی بە چارەسەرە.

لێدوانی فەرمی: ڕەسوڵ سوڵتانی، نووسەر و هاوڕێی نادری قازی بە ئاڤا میدیای وت، خاڵە قازی شاعیر دووچاری نەخۆشییەکی قورس هاتووە، چەندین نەشتەرگەری بۆ کراوە دواترینیان دەرهێنانی پەنکریاسی بوو. ئێستا پێویستی بە هاوکارییە بۆ ئەوەی لە چاودێری تەندروستی دانەبڕێت.

زانیاریی زیاتر: کەمپەینەکە لەڕێگەی ماڵپەڕی فەرمی 'gofoundme' دەکرێت و هەر کەسێک هاوکارییەکە ببەخشێت لە ماڵپەڕەکە ناوی تۆمار دەکرێت و بڕی پارەکەی نیشان دەدرێت.

ئەوەی پێویستە بیزانیت: نادری قازی لە بنەماڵەی قازییەکانی مەهابادە، جگە لە شیعری ئەوینداری و سیاسی هونەرمەندێکی شێوەکاری بە تواناشە. لەماوەی ساڵانی ڕابردوو شیعری "دوو دانە دوو دەکاتە یەک، نابێتە چوار" دەنگدانەوەیەکی زۆری دروست کرد، بەشێک لە خەڵک بە هەڵە ئەم شیعرەیان دایە پاڵ پێشەوا قازی محەممەد. بەڵام لە بنەڕەتدا ئەم شیعرە نادری قازی نووسیویەتی و لە دیوانی (هەواری شیعر) بڵاوکراوەتەوە.