ئەمریکا بۆ ئاڤا: کۆبوونەوەی ئەمڕۆ لەگەڵ ئێران هانمان دەدات بەردەوامبین لە دانوستانەکان

ئاڤا نیوز

بەرپرسێکی باڵای ئیدارەی دۆناڵد ترەمپ، سەرۆکی ئەمریکا وردەکاری گەڕی چوارەمی دانوستانەکانیان لەگەڵ ئێران بۆ ئاڤا ئاشکرا دەکات، و ئێرانیش دەڵێت، گفتوگۆکان قورس بوون، بەڵام بەسوود بوون.

وێنە گەورەکە: گەڕی چوارەمی دانوستانەکانی نێوان ئەمریکا و ئێران لە شاری مەسقەتی پایتەختی عومان بە بەشداری بەرپرسانی باڵای هەردوولا بەڕێوەچوو.

لێدوانی فەرمی: بەرپرسێکی باڵای ئیدارەی ترەمپ بە ئاڤا میدیای ڕاگەیاند:

٠ گفتوگۆکان دووبارە بە شێوەی ڕاستەوخۆ و ناڕاستەوخۆ بوون و زیاتر  لە سێ کاتژمێری خایاندووە.

٠ ڕێککەوتن کرا بۆ ئەوەی گفتوگۆکان بەرەوپێش بچن بۆ بەردەوامبوون لەلایەنە تەکنییەکانەوە.

٠ دەرئەنجامی کۆبوونەوەی ئەمڕۆمان لەگەڵ ئێران هانمان دەدات بۆ بەردەوامیدان و چاوەڕوانی کۆبوونەوەی داهاتوومان دەکەین لەگەڵ شاندی ئێراندا کە لە بڕیارە لە ئایندەیەکی نزیکدا بکرێت.

٠ سوپاسی هاوبەشە عومانییەکانمان دەکەین بۆ بەردەوامییان لە ئاسانکارییکردن بۆ کۆبوونەوەکان.

بۆچوونی لایەنی بەرامبەر: ئیسماعیل بەقائی وتەبێژی وەزارەتی دەرەوەی ئێران ڕایگەیاند، گەڕی چوارەمی دانوستانی ناڕاستەوخۆی ئێران و ئەمریکا قورس بوو، بەڵام بەسوود بوو بۆ باشتر تێگەیشتن لە هەڵوێستی یەکتر و دۆزینەوەی ڕێگەی گونجاو و واقیعی بۆ چارەسەرکردنی جیاوازییەکان، خولی داهاتووی دانوستانەکانمان بە هەماهەنگی عومان دەبێت و ئەوان ڕۆژەکەی ڕادەگەیەنن.