ئونروا: غەززە ڕۆژانە پێویستی بە 600 بارهەڵگری یارمەتیی هەیە

ئاڤا نیوز

 

دوای کردنەوەی دەروازەکان بەڕووی هاوکارییە مرۆییەکان بۆ کەرتی ‌غەززە ئاژانسی ئونراو ئاشکرای دەکات، بڕێکی زۆر زیاتر لە بارهەڵگر بۆ کەرتی ‌غەززە پێویستە بۆ ئەوەی بتوانرێت هاوکارییەکان بگەیێندرێتە تەواوی دانیشتووانی کەرتەکە.

ڕاگەیێنراوی فەرمی: ئاژانسی فریاگوزاریی نەتەوە یەکگرتووەکان بۆ پەنابەرانی فەڵەستین 'ئونروا' ڕایگەیاند،  کەرتی غەززە ڕۆژانە پێویستیی بەژمارەیەکی بەرچاوی بارهەڵگری فریاگوزاریی هەیە و کەمترین ژمارەش  500 بۆ 600 بارهەڵگرە، خەڵکی غەززە ناتوانن زیاتر چاوەڕێ بکەن، دەشڵێت، کەرتی غەززە بەدەست برسێتییەکی بێ وێنەوە دەناڵێنێت.

 

زانیاریی زیاتر: دوای  نزیکەی سێ مانگ لە گەمارۆی ئیسرائیل و داخستنی تەواوی دەروازەکان بەڕووی کەرتی غەززەدا بۆ گەیاندی هاوکاری، دواجار ئیسرائیل دەروازەکانی بەڕووی بڕێک خۆراکدا کردەوە، بەمەش نەتەوە یەکگرتووەکان و ڕێکخراوە مرۆییەکانی دیکە ژمارەیەکی زۆری بارهەڵگری فریاگوزاریی بۆ ئەو کەرتە ئامادە کردووە.

 

کاریگەری و لێکەوتەکان: هەر چەندە بڕێکی هاوکاری گەیێندراوەتە غەززە بەڵام ڕێکخراوە مرۆییەکان هۆشداریی دەدەن لەوەی ئەم هەنگاوەی حکومەتی ئیسرائیل سەرکەوتوو نابێت، بڕی هاوکارییەکان کەمن و بەشی دوو ملیۆن فەڵەستنی ناکات، هێرشەکانی ئیسرائیلش ڕۆژانە بۆ سەر کەرتی غەززە بەردەوامن.