لەسەر ڕاسپاردەی مەسرور بارزانی ملیۆنان دار لە دەورووبەری شارى هەولێر دەچێندرێن

ئاڤا نیوز

لەسەر ڕاسپاردەی سەرۆكوەزیران مەسرور بارزانی، پڕۆژەی پشتێنەی سەوزایی شاری هەولێر جێبەجێ دەكرێت و ملیۆنان دار لە دەوروبەری شارەكە دەچێندرێن.

چیرۆکی سەرەکی: ئەمڕۆ چوارشەممە، بە سەرپەرشتی وەزیری شارەوانی و پارێزگاری هەولێر و بە ئامادەبوونی ژمارەیەك لە بەرپرسانی دامودەزگا پەیوەندیدارەكان، لە دیوانى پارێزگای هەولێر، کۆبوونەوەیەکى تایبەت بە کارەکانى جێبەجێکردنى پڕۆژەی گرنگ و ستراتیژیى پشتێنەی سەوزایی هەولێر ئەنجام درا.

ڕاگەیێنراوی فەرمی: لە ڕاگەیێنراوێكی پارێزگای هەولێردا ئاماژەی بە ئەوە دراوە كە لەژێر ڕاسپاردەی سەرۆكوەزیران مەسرور بارزانی لەپێناو کەمکردنەوەى کاریگەرییەکانى گۆڕانى کەشوهەوا، بڕیارە ملیۆنان دار لە دەورووبەری شارى هەولێر بچێندرێن و لەگەڵیاندا چەندین پۆندی گلدانەوەی ئاویش دروست دەکرێت و دەبێت بە چارەسەرێکی گونجاو بۆ کەمکردنەوەی کاریگەرییەکانی گۆڕانی کەشوهەوا و دیاردەی خۆڵبارین و بەرزکردنەوەی ڕێژەی سەوزایی لە شارەکەدا.

لە كۆبوونەوەكەدا بڕیارى پێکهێنانى لیژنەیەکى هاوبەش لە نێوانیان فەرمانگە و دامەزراوەکان درا بۆ یەکلاییکردنەوەی هەر گرفت و کیشەیەک هەبێت سەبارەت بە پڕۆژەكە.

ئەوەی پێویستە بیزانیت: پشتێنەی سەوزایی هەولێر، پڕۆژەیەکى ستراتیژى و گرنگى هەولێرى پایتەختە و بەشێوەی بازنەیی بە چواردەوری هەولێر دەسوڕێتەوە و دەکەوێتە دوای شەقامی 150 مەتری، پانی پشتێنەکە 2 کیلۆمەترە، لەگەڵ دروستکردنى زیاتر لە 10  پۆند، بڕیارە لەو پڕۆژەیەدا ملیۆنان داری زەیتون و فستق بچێنرێن، ئامانج لە پڕۆژەکە جگە لە زیادکردنی ڕووبەری سەوزایی، پاراستنی زەوییە کشتوکاڵییەکانە کە بۆ پڕۆژەی نا کشتوکاڵی وەک وەبەرهێنان و نیشتەجێبوون بەکارنەیەت.