دامەزراندنی ئەنجوومەنی کاری کەنه‌دا - کوردستان بۆچی گرنگە؟

ئاڤا نیوز

هەرێمی كوردستان لەڕێگەی كردنەوەی ئەنجوومەنی كاری كەنەدا - كوردستان، دەروازەیەكی دیكەی گرنگی ئابووری و بازرگانی بەڕوودا كرایەوە، كە بە گووتەی بەڕێوەبەری گشتیی تۆماركردنی كۆمپانیاكان، كردنەوەی ئەنجوومەنەكە دەبێتە هۆی دەرفەتی زیاتری سەرمایەگوزاریی نێوان هەرێمی كوردستان و كەنەدا.

چیرۆكی سەرەكی: لە شاری هەولێر، مەڕاسیمی دامەزراندنی ئەنجوومەنی كاری كەنەدا - كوردستان بەڕێوەچوو، بە ئامادەبوونی بریكاری وەزارەتی بازرگانی و پیشەسازی بۆ كاروباری بازرگانی و باڵیۆزی كەنەدا لە عێراق و ژمارەیەك لە بەرپرسانی حكومی و كونسوڵی وڵاتان و ژوورەكانی بازرگانی و پیشەسازیی شارەكانی هەرێمی كوردستان.

لێدوانی فەرمی: بڵند محەممەد، بەڕێوەبەری گشتیی تۆماركردنی كۆمپانیاكان لە هەرێمی كوردستان بە ئاڤای ڕاگەیاند، ئەنجوومەنی كاری كەنەدا - كوردستان ڕۆڵی گرنگی دەبێت لە دروستکردنی ڕایەڵەیەکی بەهێزی بازرگانی و دۆزینەوەی دەرفەتی زیاتری سەرمایەگوزاریی لەنێوان هەرێمی کوردستان و وڵاتى کەنەدا، كە مەبەست لێى؛ پشتیوانیکردنی هەوڵەکانى حکومەتی هەرێمی كوردستانە بۆ فراوانترکردنی بازاڕی کار و وەبەرهێنانى کەنەدى.

بە تەنیشت ئەم بابەتەوە: سەروەر كەمال، بریكاری وەزارەتی بازرگانی و پیشەسازی بۆ کاروباری بازرگانی لە ڕاگەیێنراوێكی فەرمی پیرۆزبایی لە دامەزرێنەرانی ئەنجوومەنەكە كرد و ئامادەیی حكومەتی هەرێمی كوردستانی لە پێدانی مۆڵەت و ڕێكارە پێویستەكان دووپات كردەوە، كە دەبێتە دەروازەیەكی دیكە بەڕووی كوردستاندا بۆ بەهێزكردنی توانا ئابوورییەكانی.