نهێنییەکان ئاشکرا بوون؛ ئیدارەی ترەمپ ڕێگری کردووە مەسک لە کارەکەی بەردەوام بێت

ئاڤا نیوز

 

سەرچاوەیەکی نزیک لە ئیلۆن مەسک ئاشکرای دەکات، کە مەسک ویستوویەتی بەردەوام بێت لە کارکردن لەنێو ئیدارەی ترەمپ، بەڵام داواکەی ڕەتکراوەتەوە.

 

زانیاریی بەدەستهاتوو: بەگوێرەی ڕاپۆرتێکی ڕۆژنامەی تەلەگراف کە لە زاری دوو سەرچاوەی نزیک لە مەسک ئاشکرایان کردووە، ئیلۆن مەسک ملیاردێری جیهانی و بەرپرسی فەرمانگەی کارامەیی حکومەت، ویستوویەتی ماوەی کارکردنی لە کۆشکی سپی درێژ بکاتەوە، بەڵام داواکەی ڕەتکراوەتەوە.

 

هۆکارە زانراوەکان: ناکۆکییەکانی ملیاردێرەکە لە ئیدارەی ترەمپ ڕووی لە زیادبوون کرد کاتێک پڕۆژە یاسایەکانی سەبارەت بە پرسی باج و گومرگی ترەمپ بەتایبەت باج بۆ سەر کۆمپانیاکانی ئۆتۆمبێل لەنێویاندا تێسلا کە مەسک خاوەندارێتی دەکات، بووە هۆکار بۆ زیادبوونی گرژییەکان.

 

ئەوەی لەبارەیەوە دەگوترێت: سەرچاوەکان باسیان لەوەکردووە، مەسک ویستیوویەتی، درێژە بە پۆستەکەی بدات و دەستکەوتی زیاتر لەبارەی کەمکردنەوەی خەرجییەکان بەدەستبهێنێت، بەڵام ئیدارەی ئەمریکا ڕەزامەندی نەداوە، تەنانەت ئیدارەکە کاندیدکردنی یەکێک لە هاوپەیمانەکانی مەسکی بۆ سەرۆکایەتیکردنی ناسا کشاندەوە.

 

باکگراوند: دوای چوار مانگ کارکردن، ئیلۆن مەسک لە بەڕێوەبەری فەرمانگەی کارامەیی حکومەت دەستی لەکارکێشایەوە، هەفتەی ڕابردووش لە ئۆڤەڵ ئۆفیس لەلایەن ترەمپەوە مەراسیمێکی ماڵئاوایی بۆ ڕێکخرا و بەفەرمی کارە حکومییەکەی جێهێشت.