وەزیری تەندروستی: زیاتر لە 98%ـی چارەسەری شێرپەنجە لە نەخۆشخانە حکومییەکان دەکرێت

ئاڤا نیوز

زیاتر لە 98%ـی چارەسەری شێرپەنجە بەبێ بەرامبەر لە نەخۆشخانە حکومییەکان دەکرێت.

وێنە گەورەکە: لە هەرێمی کوردستان سێ نەخۆشخانە و پێنج سەنتەر چارەسەری نەخۆشانی شێرپەنجە دەکەن، چارەسەرییەکانیش کە 250 جۆری دەرمان، نەشتەرگەری، چارەسەری کیمیایی و لەیزەر لە خۆدەگرێت.

لێدوانی فەرمی: د.سامان بەرزنجی، وەزیری تەندروستی ڕایگەیاند: 98% بۆ 99%ـی چارەسەری شێرپەنجە لە نەخۆشخانە حکومییەکان دەکرێت، لەبەرئەوەی چارەسەری شێرپەنجە تێچووی زۆرە و لە نەخۆشخانە ئەهلییەکان ئەو چارەسەرییانە ناکرێن.

گۆشەیەکی دیکە: بە پێی گوتەی وەزیری تەندروستی، بەشی زۆری ئەو نەخۆشانەی لە هەرێمی کوردستان چارەسەر وەردەگرن خەڵکی باشوور و ناوەڕاستی عێراقن، بەشێکیشیان ئاوارە و پەنابەرن.

ئەوەی پێویستە بیزانیت: لەگەڵ دەستپێکی کارەکانی کابینەی نۆیەم بودجەی تایبەت بۆ چارەسەری نەخۆشی شێرپەنجە تەرخان کرا، بەردی بناغەی دوو نەخۆشخانەی تایبەت بە چارەسەری شێرپەنجە دانراون.

ئەمەش بزانە: بەپێی ئامارەکانی وەزارەتی تەندروستی، ڕێژەی تووشبوون بە شێرپەنجە لە هەرێمی کوردستان لە خوار ستانداردەکانە و 0.15%ـیە.