ئەنجوومەنی وەزیران لەبارەی شەڕ و ئاڵۆزییەکانی ناوچەکە کۆدەبێتەوە

ئاڤا نیوز

 

ئەنجوومەنی وەزیرانی هەرێمی کوردستان بەسەرپەرشتی سەرۆکوەزیران مەسرور بارزانی کۆدەبێتەوە و تاوتوێی دوایین گۆڕانکارییەکانی ناوچەکە دەکات، بڕیار لەسەر درێژکردنەوەی لێخۆشبوونى سزاکانى هاتوچۆ دەدرێت، هەروەها بەدواداچوون بۆ دامەزراندنی دەرچووانی کۆلێژە پزیشکییەکان دەکرێت.

 

چیرۆکی سەرەکی: ئەمڕۆ چوارشەممە 18-06-2025 ئەنجوومەنی وەزیرانی هەرێمی کوردستان بەسەرپەرشتی سەرۆکوەزیران مەسرور بارزانی و ئامادەبوونی قوباد تاڵەبانی؛ جێگری سەرۆکوەزیران کۆدەبێتەوە، هەڵوەستە لەسەر سێ تەوەر دەکەن.

 

وێنە گەورەکە: جەنگی نێوان ئیسرائیل و ئێران لە شەشەم ڕۆژیدا بەردەوامە، بەهۆی ئەمەشەوە چاوەڕوان دەکرێت کاریگەری ئابووری و ئاسایشی خراپی لەسەر عێراق و هەرێمی کوردستانیش هەبێت، هەر بۆیە ئەنجوومەنی وەزیرانی هەرێمی کوردستان ئامادەکاریی و پێشبینییەکان لەوبارەوە تاوتوێ دەکەن. 

 

زانیاریی بەدەستهاتوو: لە کۆبوونەوەی ئەمڕۆدا تەوەری یەکەم پەیوەستە بە هەڵوەستەکردن لەسەر، شەڕ و ئاڵۆزییەکانی ناوچەکە دواین پێشهاتە سیاسیی، سەربازی و ئەمنییەکان و کاریگەریان لەسەر هەرێمی کوردستان.

 

زانیاریی زیاتر: لە تەوەری دووەم بڕیار لەسەر درێژکردنەوەى 20٪ـی لێخۆشبوونى سزاکانى هاتوچۆ تاوەکو 31-12-2025 دەدرێت.

 

لەلایەکی دیکەوە: بەدواداچوون بۆ بڕیارێکی پێشووی ئەنجوومەنی وەزیران سەبارەت بە دامەزراندنی دەرچووانی کۆلێژی پزیشکی گشتیی و خستنەڕووی وەڵامی وەزارەتی دارایی حکومەتی فیدڕالی، تەوەری سێیەمی کۆبوونەوەکە دەبێت.