ئەمریکا پابەندبوونی خۆی بە پاراستنی ئاسایش و سەقامگیریی عێراق دووپاتدەکاتەوە

ئاڤا نیوز

 

جێگری باڵیۆزی ئەمریکا لە بەغدا ڕایگەیاند، واشنتن پابەندە بە پشتیوانیکردنی هەوڵەکان بۆ پاراستنی ئاسایش و ئارامی عێراق.

 

وێنە گەورەکە: هەرچەندە عێراق لە ئەمریکا نیگەرانە و بە فەرمی فشاری لێدەکات کە ئیسرائیل ئاسمانی عێراق بەکار نەهێنێ بۆ هێرشکردنە سەر ئێران، بەڵام ئیسرائیل بەردەوامە لە بەزاندنی ئاسمانی عێراق، ئەوەش وایکردووە بەشێک لە بەرپرسانی عێراق داوا لە حکومەت بکەن پێداچوونەوە بە ڕێککەوتنی ئەمنی نێوان بەغدا و واشنتندا بکات.

 

لێدوانی فەرمی: ئیلیزابێس ترودۆ، جێگری باڵیۆزی ئەمریکا لە بەغدا لەگەڵ محەممەد بەحرولعلوم، بریکاری وەزارەتی دەرەوەی عێراق کۆبووەوە، وەزارەتی دەرەوەی عێراق بڵاویکردەوە، لەکۆبوونەوەکەدا جێگری باڵیۆزی ئەمریکا ئەوەی خستووەتەڕوو، واشنتن لە هێرشەکانی ئیسرائیل بۆسەر ئێران بەشدارنییە و پابەندیشە بە هەوڵەکان بۆ پاراستنی ئارامی عێراق.

 

٠ باسی لەوەشکردووە، حکومەتی ئەمریکا هەوڵی چڕوپڕ دەدات بۆ ڕاگرتنی گرژییەکان و هانی هەموو لایەنەکانیش دەدات دۆخەکە هێوربکەنەوە و بە ڕێگای دیپلۆماسیی كێشەکان چارەسەر بکەن.