سوپای ئیسرائیل کردنەئامانجی پێگەیەکی ناوکی لە ئەسفەهان ڕادەگەیەنێت

ئاڤا نیوز

سوپای ئیسرائیل ڕایگەیاند، هێزی ئاسمانی شەوی ڕابردوو زنجیرەیەک هێرشی بۆ سەر چەندین ناوچەی جیاوازی ئێران ئەنجامداوە، کە پێگەیەکی ناوکی لە ئەسفەهان و چەندین سەکۆی مووشەکیی لەخۆگرتووە.

 

وێنە گەورەکە: زیاتر لە هەفتەیەکە سوپای ئیسرائیل هێرشێکی فراوانی بۆ سەر ئێران دەستپێکردووە و چەندین پێگەی ستاتیژی و ئەتۆمی لە ئێران بە ئامانجگرتووە و زیاتر لە 9 زانای بواری ئەتۆمیش کوژراون. 

 

ڕاگەیێنراوی فەرمی: سوپاکە لە بەیاننامەیەکدا ڕایگەیاند، نزیکەی 50 فڕۆکەی جەنگیی ئیسرائیلی بەشدارییان لە هێرشەکەدا کردووە و دەیان پێگەی سەربازیی سەر بە ڕژێمی ئێرانیان کردووەتە ئامانج.

 

٠ هەروەها جەختی کردەوە، فڕۆکەکانی بۆ جاری دووەم هێرشیان کردووەتە سەر پێگە ناوکییەکەی شاری ئەسفەهان، دوای ئەوەی پێشتریش لە یەکەم ڕۆژی ئۆپەراسیۆنەکەدا کرابووە ئامانج.

٠ بەپێی بەیاننامەکە، لەم پێگەیەدا قۆناغی "گۆڕینی یۆرانیۆم" جێبەجێ دەکرێت، کە قۆناغی دوای پیتاندنە و بە هەنگاوێکی سەرەکی دادەنرێت لە ڕێڕەوی بەرهەمهێنانی چەکی ناوکیدا.

 

٠ بەیاننامەکە ئاماژەی بەوەشداوە، فڕۆکە ئیسرائیلییەکان هێرشیان کردووەتە سەر دامەزراوەیەکی تایبەت بە بەرهەمهێنانی ئامێرەکانی سەنتەرفیوج لەناو هەمان کۆمەڵگەی ناوکیدا، لەگەڵ چەندین ئامانجی دیکە لە ناوچەی ئەسفەهان.

 

٠ هێرشەکان هەروەها بارهەڵگری تایبەت بە هەڵدانی فڕۆکەی بێفڕۆکەوان، ژێرخانی مووشەکی (کە پێگەی هەڵدان و کۆگاکردنی لەخۆگرتووە)، لەگەڵ چوار سەکۆی مووشەکیی ئامادە بۆ هەڵدان لەخۆگرتووە، پێش ئەنجامدانی هێرش بەرەو ئیسرائیل پووچەڵکراونەتەوە.

 

٠ بەپێی بەیاننامەکە، پێگەکانی ڕاداری سەر بە هێزە سەربازییەکانی ئێران و پاترییەکانی بەرگریی ئاسمانیش کراونەتە ئامانج، ئەمەش لە چوارچێوەی هەوڵی بەردەوامدا بۆ لاوازکردنی تواناکانی بەرگری و هێرشبەریی ڕژێمەکە.