سوپای ئیسرائیل کوژرانی حەوت سەربازی لە غەززە ڕاگەیاند

ئاڤا نیوز

سوپای ئیسرائیل ڕایگەیاند؛ بەهۆی تەقینەوەی بۆمبێک لە خان یونس لە باشووری کەرتی غەززە، حەوت سەرباز گیانیان لەدەستداوە. 

 

ڕاگەیێنراوی فەرمی: سوپای ئیسرائیل ڕایگەیاند: چەکدارانی فەڵەستینی بۆمبێکیان بە زریپۆشێکی سوپای ئیسرائیل لکاندووە و دواتر تەقاندوویانەتەوە، لەئەنجامدا حەوت سەربازی کەتیبەی 605ی ئەندازیاریی شەڕ گیانیان لەدەستداوە کە تەمەنیان لەنێوان 19 بۆ 21 ساڵ بووە.

 

زانیاریی زیاتر: ڕۆژنامەی "ئیسرائیل هایووم" ئاماژەی بەوەکردووە، "لەماوەی چەند مانگی ڕابردوودا ئەو ڕووداوە زۆرترین زیانی بە هێزە زەمینییەکان گەیاندووە".

 

لەلایەکی دیکەوە: ئەمڕۆ چوارشەممە، کەتیبەکانی قەسسام، باڵی سەربازیی بزووتنەوەی حەماس ڕایگەیاند؛ بولدۆزەرێکی سەربازی D9 بە بۆمبی "شەواز" تێکشکێندرا و بۆ ماوەی کاتژمێرێک گڕی گرتووە، دوای ئەوە بولدۆزەرێکی دیکەی سەربازی بۆ ڕزگارکردن هاتە شوێنی ڕووداوەکە، بە چەکی ئاڕبیجیی "یاسین 105" کرایە ئامانج لە ناوچەی تەوحید لە باشووری شاری خان یوونس لە کەرتی غەززە.

 

باکگراوند: لە 7ی تشرینی یەکەمی ساڵی 2023وە، 871 ئەفسەر و سەربازی ئیسرائیل کوژراون، 428 یان لە ئۆپەراسیۆنی زەمینیی سوپا لە کەرتەکە بووە هاوکات شەش هەزار ئەفسەر و سەرباز برینداربوون لەوانەش دوو هەزار و 738 یان لە ئۆپەراسیۆنی زەمینی بووە.