بوومەلەرزەیەک سۆران و دەورووبەری دەهەژێنێت

ئاڤا نیوز

کەمێک لەمەوبەر بوومەلەرزەیەک چەند ناوچەیەکی سنووری ئیدارەی سەربەخۆی سۆرانی هەژاند و خەڵکی ناوچەکە بە ئاشکرا هەستیان پێکردووە.

لێدوانی فەرمی: مەقبیلە فایەق، بەڕێوەبەری کەشناسی ئیدارەی سەربەخۆی سۆران بە ئاڤای ڕاگەیاند: لە سنوری سۆران هەست بە بوومەلەرزە کراوە، بەڵام بەهۆی نەبوونی ئامێری تۆمارکردنی بومەلەرزە، تا ئێستا بەتەواوی ڕێژەکەی نازانرێت و چەقی بومەلەرزەکە دیارنیە، "چاوەڕێی داتاکانی کەشناسی هەرێمی کوردستان دەکەین".

زانیاریی زیاتر: بەشێک لە هاونیشتمانیان بە ئاڤایان وتووە، بوومەلەرزەکە بەهێز بووە و دەرگا و پەنجەرەی ماڵیان هەژاوە، بۆیە بەشێک لە خەڵک لە ماڵەکانیان هاتوونەتە دەرەوە.

لەلایەکی دیکەوە: بەڕێوەبەرایەتیی گشتیی و بوومەلەرزەزانی هەرێمی کوردستان ڕایگەیاند، بوومەلەرزەکە کاتژمێر 04:14:52ـی ئێوارەی 30-06-2025 بە گوڕی 4.0 ڕێختەر لە دووری 6 کیلۆمەتر لە سەنتەری قەزای چۆمان بە قوڵایی 12 کیلۆمەتر ڕوویداوە.